Elimizdiń Bas múftıi men Qazaqstan mıtropolıti «Qazaqstan halqy Assambleıasyna 20 jyl» estelik medalimen marapattaldy (FOTO)

ASTANA. QazAqparat - Búgin QR Mádenıet jáne sport mınıstri Arystanbek Muhamedıuly Qazaqstan musylmandary dinı basqarmasynyń Tóraǵasy, Bas mýftı Erjan Malǵajyuly men QR-daǵy Orys pravoslav shirkeýiniń Mıtropolıt okrýginiń basshysy, Astana jáne Qazaqstan mıtropolıti Aleksandrǵa memlekettik jáne qoǵamdyq qyzmette qol jetkizgen jetistikteri úshin «Qazaqstan halqy Assambleıasyna 20 jyl» estelik medalin tapsyrdy.

«Búgingi tańda birligi men yntymaǵy jarasqan el Qazaqstan ekendigi dúnıe júzine belgili. Árıne, elimizdegi birlik pen yntymaqtyń jarasýy eń aldymen Elbasymyz Nursultan Nazarbaevtyń orasan zor eńbeginiń arqasy», - dep atap ótti mınıstr marapattardy tapsyrý rásiminde.

Sonymen qatar ol elimizde bıyl Qazaqstan halqy Assambleıasynyń 20 jyldyǵy, Qazaq handyǵynyń 550 jyldyǵy men Jeńistiń 70 jyldyq mereıtoıy keńinen atalyp ótilip jatqanyn eske saldy.

«Osy sharalardyń aıasynda Elbasymyzdyń Jarlyǵymen Bas mýftı Erjan Malǵajyuly men Astana jáne Qazaqstan mıtropolıti Aleksandr «Qazaqstan halqy Assambleıasyna 20 jyl» mereıtoılyq medalimen marapattaldy», - dedi A.Muhamedıuly.