Elimizdiń barlyq tabystary - halyqtyń tynymsyz, orasan jáne jemisti jumysy Sizdiń basshylyǵyńyzben júzege asyp keledi - Prezıdent poshtasynan
ASTANA. 4 shilde. QazAqparat - Qazaqstan Prezıdenti Nursultan Nazarbaevtyń atyna Aqmola oblysy, Shortandy aýdany, №1 Jolymbet orta mektebin 1966 jyly bitirgen túlekterden hat keldi, dep habarlady QR Prezıdentiniń baspasóz qyzmeti.
Olardyń kópshiligi osy jyldar ishinde taǵdyr jazýymen TMD-nyń basqa respýblıkalary men alys shetelge shashyrap ketken. Astanaǵa synyptas dostarymen kezdesýge kelip, Qazaqstannyń jańa astanasynyń kelbetine tań qalǵandaryn aıtady. «Jańa qala bizdi óziniń erekshe ásemdigimen, ádemiligimen, zamanaýı sáýletimen baýrap aldy. Qalanyń ózi de, Beıbitshilik jáne kelisim saraıy, «Nur-Astana» meshiti, «Báıterek» - bári de nurlanyp, jarqyrap tur. Júzege asyrylǵandardyń barlyǵy mundaǵy keńpeıil, jaıdary, ádemi adamdardyń kelbetimen astasyp jatqandaı kórinedi. Kózben kórgenimizdi bárine aıtyp qana qoımaı, qalaǵa taǵy da oralyp, osynaý ǵajaıyp alańdarmen, saıabaqtarmen, eskertkishtermen tanystyǵymyzdy jalǵastyryp, dostarymyzben jáne tanystarymyzben qaıta aralasqymyz keledi».
Hat ıeleri Nursultan Nazarbaevqa ásem astana men Qazaqstanda beıbitshiliktiń saqtalyp otyrǵany úshin alǵys aıtady:
«Qurmetti Nursultan Ábishuly, elimizdiń barlyq tabystary - halyqtyń tynymsyz, orasan jáne jemisti jumysy Sizdiń basshylyǵyńyzben júzege asyp keledi. Sizge bizdiń ortaq Otanymyzdy órkendetý isinde tabystar jáne zor densaýlyq, uzaq ǵumyr tileımiz», - delingen hatta.
