Elimizdiń barlyq óńirlerindegi orman alqaptarynda órt baqylaý munaralary jetkiliksiz
ASTANA. Tamyzdyń 21-i. QazAqparat /Marlan Jıembaı/ - Elimizdiń barlyq óńirlerindegi orman alqaptarynda órt baqylaý munaralary jetkiliksiz. Bul týraly búgin QR Tótenshe jaǵdaılar mınıstrlignde ótken selektorlyq keńes barysynda QR Aýyl sharýashylyǵy mınıstrligi Orman jáne ań sharýashylyǵy komıtetiniń tóraǵasy Erlan Nysanbaev málim etti.
Onyń atap ótýinshe, bekitilgen josparǵa sáıkes Orman jáne ań sharýashylyǵy komıtetiniń aımaqtyq bólimsheleri men QR TJM Órtke qarsy qyzmeti orman sharýashylyqtarynyń qurylymdyq bólimshelerimen birlesip, oblystardaǵy orman jáne dala alqaptaryndaǵy órt qaýipsizdigi talaptarynyń saqtalýyna jappaı tekserý júrgizgen. «Tekseris nátıjesinde aýqymdy orman órtterine jol bermeýde qazirgi ýaqytta oblys ákimdikteri qabyldap otyrǵan sharalar jetkiliksiz. Bul oraıda tilsiz jaýdy der ýaqytynda anyqtaý negizgi ról atqarady», dep atap ótti ol.
Bul oraıda órt baqylaý munaralarynyń atqarar qyzmeti orasan zor. Alaıda E.Nysanbaevtyń sózine qaraǵanda, Qostanaı, Soltústik Qazaqstan, Aqmola, Batys Qazaqstan, Ońtústik Qazaqstan oblystarynda jerdegi orman órtin anyqtaý úshin qajetti jańa órt baqylaý munaralaryn ornatý sharalary qabyldanbaǵan. «Máselen, Qostanaı oblystaǵy 24 baqylaý munarasynyń 2-ýi apatty jaǵdaıda. 18 qosymsha munara qurylysy josparlanǵanymen sońǵy 10 jyldyń ishinde birde-bir mundaı qurylǵy ornatylmaǵan. Al Aqmola oblysynda 43 munara bar, oǵan qosymsha taǵy 21-i qajet. Alaıda sońǵy 4 jyldyń ishinde Úrimqaı men Stepnogor memlekettik orman sharýashylyǵy mekemesinde ǵana bir-birden ornatylǵan», dedi ol.
