Elimizdiń barlyq óńirine qazaqstandyq rentgen apparaty jetkiziledi

NUR-SULTAN. QazAqparat – Qazaqstan óńirleriniń bárine otandyq óndiristen shyqqan tsıfrlyq rentgen apparattary beriledi. Olardyń qashan jetkiziletinin Densaýlyq saqtaý mınıstri Alekseı Tsoı aıtyp berdi, dep habarlaıdy QazAqparat tilshisi.

«Halyq úshin dıagnostıkalyq qyzmetterdiń qoljetimdi bolýy úshin pandemııa ýaqytynda oblys ákimdikteri otandyq óndiristen shyqqan tsıfrlyq rentgen apparattaryn satyp alyp jatyr. Osy apparattyń alǵashqy 24-i 20 qazanǵa deıin deıin Qostanaı, Aqmola, Túrkistan oblystaryna jetkiziledi. Qalǵan óńirlerdiń bárine apparat 30 qazanǵa deıin jetkiziledi», - dedi Alekseı Tsoı OKQ-da ótken baspasóz máslıhatynda.

Onyń aıtýynsha, medıtsınalyq qyzmetti jaqsartýdyń taǵy bir talaby – alystaǵy eldimekender úshin kóliktik medıtsınany damytý.

«Búgingi kúni kóshpeli medıtsına keshenderiniń 28 danasy ázirlendi. Onyń bir bóligi Qostanaı qalasyna jetkizildi. Qalǵan keshender aımaqtarǵa taratylady. Kelisimshartqa sáıkes olar eldimekenderge 20 qazanda jetkiziledi», - dedi ol.