Elimizdiń barlyq oblystarynda street workout alańqaılary ashyldy
ASTANA. QazAqparat - Ótken demalys kúnderi Qazaqstannnyń taǵy eki qalasynda Street workout-pen shuǵyldanýǵa arnalǵan alańqaılardyń saltanatty túrde ashylý rásimi ótti, dep habarlaıdy Olympic.kz.
Mundaı syılyqty QR Ulttyq Olımpıadalyq komıtetiniń prezıdenti Tımýr Qulybaev tartý etti.
Qostanaı qalasyndaǵy Street workout alańqaıynyń ashylýyna ákimdik ókilderi, qala turǵyndary men qonaqtary qatysty. Street workout-tan elimizdegi eń myqty komanda sanalatyn Bar Bars toby turǵyndar aldynda óner kórsetip, sheberlik saǵattaryn ótkizdi.
Olar jergilikti halyqty sportpen shuǵyldanýǵa shaqyrǵan bolatyn. Ashylý saltanatyna qatysqan qala turǵyndaryna Qazaqstan Street Workout federatsııasynyń atynan syılyqtar taratyldy.
Sondaı-aq, 8 qyrkúıek kúni Pavlodar qalasynda arnaıy alańqaılar ashyldy. Saltanatty is-sharany erkin kúresten KSRO sport sheberi, Pavlodar qalasynyń qurmetti azamaty Aıtmaǵambetov Amangeldi Saparǵalıuly ashty.
Ol óz sózinde buqaralyq sportty damytýǵa ólsheýsiz úles qosqan Elbasyǵa, el turǵyndaryna sportpen shuǵyldanýǵa múmkindik bergen Ulttyq Olımpıadalyq komıtet basshysyna alǵys aıtty.
Qala turǵyndary jańa alańqaılardyń ashylǵanyna rızashylyǵyn bildirse, jastar men jasóspirimderdiń qýanyshynda shek bolǵan joq. Aıta ketelik, Street Workout - eń qoljetimdi sport túrleriniń biri. Bul sportpen aınalysý úshin alańqaı men erik-jiger ǵana qajet.
2016 jyldan beri Ulttyq Olımpıadalyq Komıtet Qazaqstan Street Workout federatsııasymen birlese otyryp, el turǵyndarynyń dene shynyqtyrý jáne sportpen aınalysýyna múmkindik beretin jobany júzege asyrýda. Ótken jyly QR UOK basshysynyń bastamasymen elimizde 60-tan asa alańqaılar paıda boldy.
Arnaıy sport alańqaıy Almaty, Aqtaý, Aqtóbe, Jańaózen, Shymkent, Qyzylorda, Taraz, Qaraǵandy, Kókshetaý, Semeı, Óskemen jáne Astana qalalarynda ashyldy. Endi atalǵan tizimge Qostanaı men Pavlodar enip otyr.
Qazaqstan boıynsha 80 sport alańy ashylyp, Qazaqstan Street Workout-ty qarqyndy damytyp otyrǵan úzdik úsh eldiń qataryna endi.
