Elimizdiń barlyq azamattary qazaq tilin meńgerýge tyrysyp jatqanda, Prezıdenttikke kandıdattyń osaldyq tanytýy úlken kemshilik – lıngvıstıkalyq komıssııa múshesi F.Orazbaeva
ASTANA. 9 aqpan. QazAqparat /Aıdar Ospanalıev/ - Elimizdiń barlyq azamattary qazaq tilin meńgerýge tyrysyp jatqanda, Prezıdenttikke kandıdat Ýálıhan Qaısarovtyń memlekettik tildi meńgerýde osaldyq tanytýy úlken kemshilik.
Prezıdenttikke kandıdattardyń memlekettik tildi erkin meńgerýin anyqtaý jónindegi lıngvıstıkalyq komıssııa múshesi, Pedagogıka ǵylymynyń doktory, professor Faýzııa Orazbaeva búgin «QazAqparat» tilshsine bergen suhbatynda osylaı aıtty.
«Ýálıhan Qaısarovtyń memlekettik tildi úırenýge degen talpynysy, nıeti, osy tildi meńgere bastaǵanynyń ózi qýantady. Alaıda biz qazir ony qazaq tilin tolyq meńgerdi dep aıta almaımyz», - dedi Faýzııa Orazbaeva.
Faýzııa Orazbaeva Ýálıhan Qaısarov 2007 jyly da Prezıdenttikkke úmitker retinde memlekettik tilden emtıhan tapsyrǵanyn aıta kele: «Arada bes jyl ótken soń kezekten tys Prezıdenttik saılaýǵa óziniń kandıdatýrasyn usynyp, alǵashqylardyń biri bolyp, Prezıdenttikke kandıdattardyń memlekettik tildi erkin meńgerýin anyqtaý jónindegi lıngvıstıkalyq komıssııaǵa emtıhan tapsyrdy. Ol kezdegi emtıhan da úsh satyly deńgeıde ótti. Biraq qazirgi emtıhan men osyǵan deıingi saılaýdaǵy emtıhan arasynda aıtarlyqtaı aıyrmashylyq bar ekenin atap ótý kerek. Óıtkeni ol ýaqytta kandıdatqa azdaǵan qatelerin elemesten óz oıyn tolyq jetkizdi degen baǵa berdik. Onyń ústine Ý.Qaısarovtyń ol kezdegi daıyndyǵy búgingiden kósh ilgeri edi. Bálkim tańdaǵan taqyryptary jeńil boldy ma, ol ózin jaqsy kórsete bildi. Árıne múlde qate jibergen joq deý durys emes. Biraq onyń qazaq tiline degen sol kezdegi ynta-yqylasyn biz nazarǵa aldyq. Sodan bergi arada 5 jyl ótti. 5 jylda memlekettik tilge degen talap kúsheıdi. Al Prezıdenttikke úmitker emes elimizdiń barlyq azamattary qazaq tilin meńgerýge tyrysyp jatqanda osaldyq tanytý úlken kemshilik bolmaq»,-dedi.
Onyń sózinshe, Ý.Qaısarov aldynda atap ótkendeı osy synaqtan buryn da ótken jáne onyń ne ekenin jaqsy biledi. «Biraq bul joly onyń jazý saýaty tómen boldy. Belgili bir taqyryp boıynsha óz oıyn jetkizýi de kemshin túsip jatty. Ol birinshi oryssha oılap, ony qazaqshaǵa aýdarýǵa tarysty. Osydan kelip kóptegen qatelikter týyndady. Proza men poezııany oqýdan ǵana birshama durys ótti», - dedi
