Elimizdiń balet sheberi Bolat Aıýhanov Halyqaralyq Sokrat syılyǵyna usynyldy
ALMATY. Qazannyń 11-i. QazAqparat /Názıra Eleýhan/- Belgili balet sheberi, QR Halyq ártisi Bolat Aıýhanov mádenıet jáne óner salasynyń «International Socrates Prize» atty Halyqaralyq Sokrat syılyǵynyń laýreaty ataǵyna usynyldy.
Horeografııa metri Bolat Aıýhanovqa júlde búgin keshke, Kóshbasshylardyń Oksford sammıti aıasynda ótetin, XLVII-shi «Socrates Award Ceremony» saltanatty marapattaý rásiminde tabystalady.
Júldege usynǵyn Evropalyq Bıznes Assambleıa Atalymdyq Komıtetiniń (EVA, Oksford, Ulybrıtanııa) Bas dırektory Djon V.Nettın óz habarlamasynda "Sizdi joǵarǵy qoǵamdyq baǵa alǵandyǵyńyzben quttyqtaımyz. Bul sizdiń álemdik ónerge jáne Qazaqstan Respýblıkasynyń aldyńǵy qatarly balet ujymynyń jetekshisi retinde qosqan úlesińizdiń moıyndalǵany", delingen.
"Socrates Award Ceremony" atty Halyqaralyq Sokrat syılyǵy - bul kásibı saladaǵy joǵarǵy jetistikterdiń baǵasy, eń joǵarǵy, halyqaralyq dárejede moıyndalǵandyqtyń belgisi.
«Almatynyń jas baletiniń» shyn máninde Memlekettik akademııalyq klassıkalyq bı ansambline aınalyp, repertýarynyń baı, sheberlikteriniń joǵary bolýynda Aıýhanovtyń úlesi erekshe. Onyń qoltańbasyna izdenis, mýzykalyq bıik mádenıet, klassıkalyq kórkem bı tásilderiniń taýsylmaıtyn qazynasyn meńgerýge umtylys, jańalyqqa qushtarlyq tán. Aıýhanov jetekshilik etip kele jatqan ansambl dúnıe júzine keńinen tanymal bolyp, horeografııalyq ónerdi ıgerýi jóninen álemdik balet ujymdarynyń eń úzdigi sanalatyn alǵashqy ondyǵyna engen. Onyń «Meniń baletim», «Sezimder ómirbaıany» atty kitaptary bar. Eýropa mádenıetiniń 20-shy ǵasyrdaǵy 60 jaryq juldyzy týraly shyǵatyn 25 kitaptyń bireýi Aıýhanovtyń ómiri men ónerine arnalǵan (avtory avstralııalyq óner zertteýshisi ıÝrı Rıýntıý). Ol otandyq balet ártisterin tárbıelep shyǵarýǵa da kóp úles qosty. Aıýhanov arnaıy shaqyrýmen Túrkııada «Mahabbat ańyzy», Tashkentte «Aldar Kóse» baletterin qoıǵan. Ol «Qurmet belgisi», «Eńbek Qyzyl Tý» ordenderimen marapattalǵan. Búginde Bolat Aıýhanov - búkil álemge tanymal horeograf, T.Júrgenov atyndaǵy Óner akademııasynyń professory, halyq ártisi, Memlekettik syılyqtyń laýreaty, Ystambul, Semeı, Ekibastuz qalalarynyń qurmetti azamaty.
