Elimizdiń aımaqtarynda sý tasqynynyń aldyn alý jáne onyń saldaryn joıý barysy (FOTO)
ASTANA. QazAqparat - Qazaqstan Respýblıkasynyń Іshki ister mınıstrligi jergilikti atqarýshy organdarmen birlesip birqatar apatty jaǵdaılardyń aldyn alý sharalaryn júzege asyrdy, sonyń arqasynda Qaraǵandy, Aqmola, Soltústik Qazaqstan, Shyǵys Qazaqstan jáne Pavlodar oblystarynda sý tasqynynyń jaǵymsyz saldaryn boldyrmaý múmkin boldy, dep habarlanǵan QR TJM saıtynda.
Atap aıtqanda, sý tasqynynyń aldyn alý jáne onyń saldaryn joıý maqsatynda 10,37 myń tonna janar-jaǵar maı, 188 myń tonna ınertti materıaldar, 1084,8 myń tonna qap, 89,4 tonna jarylǵysh zattar kóleminde qor ázirlendi. Elid mekenderden qar shyǵarý jumystary jalǵastyrylyp jatyr.
Ákimdiktiń tótenshe jaǵdaılar úshin qorynda 6,39 mlrd. teńge kóleminde qarajat bar. QR ІІM jergilikti atqarýshy organdarmen birlesip apattan qutqarý bólimsheleriniń toptary quryldy, onyń quramynda 23 972 adam bar, olar 7361 tehnıkamen, 982 sýda júzý quraldarymen, 16 tikushaqpen jaraqtalǵan. Al sý tasqyny saldaryn joıý úshin 8260 adamnan turatyn top quryldy, olar 1230 tehnıkamen, 9 tikushaqpen, 211 sýda júzý quraldarymen jabdyqtalǵan (onyń ishinde Ulttyq gvardııadan - jeke quramnan 2585 adam, 260 tehnıka, oblystardyń, Astana, Almaty qalalarynyń ishki ister departamentterinen - jeke quramynan 760 adam men 79 tehnıka). Ortalyq, shyǵys jáne soltústik óńirlerde sý tasqyny qaýpin eskerýmen 7 sáýirden bastap QR ІІM Soltústik Qazaqstan, Aqmola, Qaraǵandy oblystarynda basqa óńirler esebinen 534 adam, 90 tehnıka, 34 sýda júzý quraldary, 24 motopomp qamtylǵan toptar quryldy. Shyǵys Qazaqstan, Qostanaı, Pavlodar oblystarynda sý tasqyny saldaryn joıý toptarynda 2313 adam, 315 tehnıka, 47 sýda júzý quraldary, 27 motopomp qamtylǵan. Sonymen qatar oblys ortalyqtarynda eldiń shalǵaı aımaqtaryna qajetti kúshter men materıaldyq resýrstardy, tirshilikke qajetti quraldardy jetkizý úshin «Qazavıaqutqarý» AQ 9 tikushaǵy ázirlengen. Eldi mekenderde sý tasqyny qaýpi týraly eskertý úshin 413 polıtsııa patrýli kólikteriniń baǵyttary jańartyldy.
