Elimizdiń aımaqtarynda kórsetiletin medıtsınalyq qyzmet talapqa saı emes - qoǵamdyq keńes
ASTANA. 3 qyrkúıek. QazAqparat /Aıdar Ospanalıev/ - Densaýlyq saqtaý salasynda senim telefondary men qoǵamdyq qabyldaý oryndaryna habarlasýshylar men medıtsına salasy men onda kórsetiletin qyzmetterge qatysty ózderiniń oı-pikirlerin blogqa habarlaýshylar sany artýda.
Bul týraly keshe, Densaýlyq saqtaý mınıstrliginde selektorlyq rejımde ótken Patsıentterdiń quqyqtaryn qorǵaý jónindegi qoǵamdyq keńestiń májilisinde málim boldy.
Májilis barysynda kóterilgen máselelerge qatysty Densaýlyq saqtaý mınıstrliginiń baspasóz qyzmeti taratqan málimetterge qaraǵanda, sońǵy ýaqytta qalyń kópshilik tarapynan sybaılas jemqorlyq áreketterine qatysty málimetter jıi jetkizile bastady. 2010 jyly mundaı faktiler 4,65 paıyz bolsa, bıylǵy jyly kórsetkish 13,2 paıyzdy quraǵan. Zańdy jáne jeke tulǵalardyń aryz-shaǵymdary boıynsha bıylǵy jyly Densaýlyq saqtaý mınıstrligi quqyq qorǵaý organdaryna 300 materıal joldaǵan. Sonymen qatar jıyn barysynda aryz-shaǵymdardyń kópshiligi jergilikti jerlerdegi turǵyndarmen jumystyń aqsap jatýyna baılanysty jazylatyndyǵy aıtyldy. Otyrys qorytyndysyna sáıkes, aımaqtaǵy patsıentterdiń quqyqtaryn qorǵaý shtabtarynyń jumystaryn kúsheıtý usynyldy.
