Elimizdiń áýejaılary salmaqty reformany qajet etedi - Ǵ. Ábdirahymov
ASTANA. 15 qazan. QazAqparat - Elimizdiń áýejaılary salmaqty reformany qajet etedi. Bul týraly búgin Parlament Májilisinde ótken Úkimet saǵatynda básekelestikti qorǵaý agenttiginiń tóraǵasy Ǵabıdolla Ábdirahymov málim etti.
Baıandama barysynda elimizdegi áýejaılardyń bazalyq qyzmetterine jasalǵan taldaýǵa toqtala kele agenttik tóraǵasy, áýejaılardyń qyzmetteri tabıǵı monopolııalar salasyna jatatynyn, mundaı qyzmetterde tarıfterdi memleket retteıtinin aıtty. Onyń sózine qaraǵanda, atalǵan tekserýler barysynda 21 áýejaıdyń ishinde 8-i ǵana rentabeldilik tanytatyny belgili bolǵan. Sondyqtan da, bul salada birtalaı reforma júrgizý qajettigin alǵa tartady agenttik tóraǵasy.
«Reseı men Eýroodaq elderiniń tájirıbelerin zerttep, jergilikti áýejaılardyń básekege qabilettiligin arttyrý úshin birqatar usynystar jasamaqpyz. Birinshiden, áýejaılar aýmaǵynda avıakerosın baǵasyn tómendetý úshin birneshe kompanııalarǵa avıakerosın satýǵa múmkindik berýimiz kerek. Áýejaılardy shyǵynǵa ushyratqan qyzmetter tarıfterin qaıta qaraý qajet. Áýejaılardyń ózge de qyzmetterden túsetin tabysy 5 paıyzdan aspaýy tıis delingen quqyqty alyp tastaýymyz kerek», - deıdi Ǵ. Ábdirahymov.
Osy rette agenttik tóraǵasy vedomstvo «bir marshrýt - birneshe tasymaldaýshylar» qaǵıdatyn saqtaýdy usynǵanyn, muny Kólik jáne kommýnıkatsııa mınıstrligi otandyq avıakompanııalar arasynda avıamarshrýttardy bólý kezinde eskergenin atap ótti. «Aǵymdaǵy jyly marshrýttarda eki-úsh tasymaldaýshylar jumys isteıdi. Máselen, Almaty-Astana-Almaty baǵytynda «Skat» jáne «Eır Astana» kompanııalarymen qosa tamyzdan bastap «Bek-Eır» avıakompanııasy ushýdy bastady. Olardyń avıabıletiniń quny 15 myń teńge», - deıdi Ǵ. Ábdirahymov.
