Elimizdiń Áýe qorǵanysy kúshteri 13 jyldyǵyn atap ótti (FOTO)

ASTANA. QazAqparat - QR QK Áýe qorǵanysy kúshteriniń 44813 áskerı bólimi óziniń qurylýynyń 13 jyldyǵyn atap ótti, dep habarlaıdy QR Qorǵanys mınıstrliginiń baspasóz qyzmeti.

«Áskerı bólim jeke quramy kúndiz-túni kez kelgen aýa raıy jaǵdaıynda Qazaqstan Respýblıkasynyń qorǵanys qabilettiligine qomaqty úles qosa otyryp, elordamyzdyń áýe keńistigin, Qazaqstannyń áýe shepterin kúzetý jóninde jaýyngerlik kezekshilikti atqarady», delingen habarlamada.

Qazirgi ýaqytta bólim qarsylastyń áýeden shabyldaý quraldaryn anyqtaý jáne joıý jónindegi joǵary jaýyngerlik múmkindikteri bar zamanaýı qarý-jaraqpen qamtamasyz etilgen.

«Qurmetti áriptester, jaýyngerlik dostar Sizderdi bólimniń qurylý kúnimen quttyqtaǵym kelip otyr. Barshalaryńyzǵa abyroılaryńyzdy saqtaı otyryp, Otanymyzǵa adal qyzmet etýge, qazaqstandyq armııanyń jaýyngeri joǵary ataǵyna laıyqty bolyp, maqtanyshpen alyp júrýlerińizge tilektespin», - dedi saltanatty is-shara barysynda bólim komandıri polkovnık Bagdat Nurpeıisov.

Bólimniń qurylǵan sátinen bastap bólim jeke quramy «Qalqan» jáne «Jaýyngerlik dostastyq» sııaqty taktıkalyq oqý-jattyǵýlarǵa qatysty, Qazaqstan Respýblıkasynyń Prezıdentinen gramota aldy, 2004 jyly bólimge Jaýyngerlik Tý tabys etildi.

Saltanatty is-shara barysynda bólim komandıri jaýyngerlik jáne memlekettik-quqyqtyq daıarlyqtaǵy úzdikterdi qurmet gramotalary jáne baǵaly syılyqtarmen marapattady.