Elimizdiń Atyraý oblysy, Astana men Almaty qalalarynda halyqtyń aqshalaı tabysy joǵary
ASTANA. QazAqparat - 2013 jylǵy jeltoqsanda halyqtyń ortasha jan basyna shaqqandaǵy ataýly aqshalaı tabystary aldyn ala berilgen derekter boıynsha 64 myń 775 teńgeni qurady. Bul 2012 jylǵy tıisti kezeńmen salystyrǵanda 7,7 paıyzǵa joǵary.
QR Statıstıka agenttiginiń málimetterine qaraǵanda, esepti kezeńde naqty aqshalaı tabystar 2,8 paıyzǵa ósken. Sonymen qatar, 2013 jylǵy jeltoqsanda ortasha jan basyna shaqqandaǵy aqshalaı tabystardyń kólemi boıynsha Atyraý oblysy, Astana jáne Almaty qalalary aldyńǵy qatarda tur. Atalǵan óńirlerdegi kórsetkish ortasha respýblıkalyq deńgeıden 2,1-1,9 esege artyq. Kerisinshe, tabysy eń tómen óńirler qatarynda Ońtústik Qazaqstan, Jambyl jáne Almaty oblystary belgilenip otyr, atalǵan óńirlerde halyqtyń tabys mólsheri respýblıkalyq deńgeıden 58,1 paıyzdan 74,5 paıyzǵa deıingi aralyqty quraǵan.
«Sonymen birge, halyqtyń naqty aqshalaı tabystarynyń eń kóp ósý qarqyny Aqtóbe jáne Pavlodar oblystarynda belgilendi. 2013 jylǵy jeltoqsanda óńirler boıynsha ataýly aqshalaı tabystardyń eń joǵary jáne eń tómen mólsherleri arasyndaǵy araqatynas 3,6 eseni qurady», - delingen baspasóz baıanynda.
