Elimizdiń áskerı qyzmetshileri «Jaýyngerlik dostastyq-2021» oqý-jattyǵýyna qatysýda

NUR-SULTAN. QazAqparat - «Jaýyngerlik dostastyq-2021» birlesken oqý-jattyǵýy TMD-ǵa múshe elderdiń Qorǵanys mınıstrleri keńesiniń sheshimine sáıkes josparlanǵan, dep habarlaıdy QazAqparat QR Qorǵanys mınıstrliginiń baspasó qyzmetine silteme jasap.

Baspasóz qyzmetiniń málimetterine qaraǵanda, Reseı Federatsııasynyń aýmaǵynda Astrahan oblysynyń «Ashýlýk» polıgonynda ótip jatqan oqý-jattyǵýǵa TMD-ǵa múshe bes memleketten 2 000-nan astam áskerı qyzmetshi qatysty.

«Jaýyngerlik dostastyq-2021» oqý-jattyǵýynyń belsendi kezeńi 14-25 qyrkúıek aralyǵynda Qazaqstanda «Saryshaǵan» polıgonynda ótedi. Oǵan Áýe shabýylyna qarsy qorǵanys áskerleri men Áskerı-áýe kúshterinen
1 300-den astam áskerı qyzmetshi jáne 400-ge jýyq qarý-jaraq pen áskerı tehnıka jumyldyrylady. Atap aıtqanda, S-300PS, S-75, S-125, «Kýb», «Býk-M2e» zenıttik-zymyran keshenderi, radıoelektrondyq kúres bólimsheleriniń tehnıkasy, Sý-30SM, Sý-27 kópfýnktsıonaldy joıǵyshtary, sondaı-aq, S-295 áskerı-kólik ushaqtary, L-39 jańǵyrtylǵan jaýyngerlik oqý-jattyǵý ushaqtary, Mı-171Sh, ES-145 tikushaqtary jáne ushqyshsyz ushý apparattary.

Belsendi faza barysynda ÁShQQ jaýyngerlik eseptoptary zenıttik-zymyran keshenderinen is júzinde oq atady. Áskerı avıatsııa ekıpajdary áýedegi jáne jerdegi nysanalardy avıatsııa quraldaryn urysta qoldaný arqyly zaqymdaı otyryp, kúndizgi jáne túngi ushýlardy pysyqtaıdy.

– Oqý-jattyǵý áskerı basqarý organdarynyń daıyndyq deńgeıin, jaýyngerlik eseptoptar men ekıpajdardyń úılesimdiligin arttyrý, sondaı-aq áýe shabýylyna qarsy jáne áýede shaıqastardy júrgizý tásilderin pysyqtaý maqsatynda ótkiziledi. Qarýly qaqtyǵystarda avıatsııa men áýe shabýylyna qarsy qorǵanys áskerlerin qoldanýdy uıymdastyrý boıynsha túrli taktıkalyq epızodtar kórsetiledi, – dep atap ótti Áýe qorǵanysy kúshteri Bas shtabynyń bastyǵy general-maıor Fazylolla Bádenov.