Elimizdiń áskerı qyzmetshileri «Myzǵymas baýyrlastyq-2021» bitimgershilik oqý-jattyǵýyna qatysýda

NUR-SULTAN. QazAqparat - Reseı Federatsııasynda UQShU bitimgershilik kúshteri arasynda «Myzǵymas baýyrlastyq-2021» oqý-jattyǵýynyń saltanatty ashylý rásimi ótti, dep habarlaıdy QR QM baspasóz qyzmeti.

Áskerı manevrlerge Armenııa, Belarýs, Qazaqstan, Qyrǵyzstan, Reseı jáne Tájikstannyń bitimgershilik bólimsheleri qatysady. Olardyń negizgi maqsaty – beıbitshilikti qoldaý jónindegi operatsııalardy júrgizý kezinde UQShU ujymdyq bitimgershilik kúshteriniń quramyna kiretin áskerı bólimder men bólimshelerdiń úılesimdiligin arttyrý.

Birikken áskerı kontıngent beıbitshilikti qoldaý jónindegi operatsııany daıyndaý men júrgizý boıynsha tapsyrmalardy pysyqtaıdy. Olar gýmanıtarlyq júkterdi alyp júrý, jerlerdi patrýldeý, daǵdarys aýmaǵynda shıelenisterdi retteý úshin tosqaýyl beketterin uıymdastyrý jáne eldi mekendi buǵattaý. Buǵan qosa, bitimgerler bosqyndar lageri men tekserý pýnkterindegi jumysty uıymdastyrýda tájirıbe jınaqtaıdy.

Bul oqý-jattyǵýǵa UQShU-ǵa múshe memleketterdiń qarýly kúshteri men quqyq qorǵaý organdarynyń 1,7 myńnan asa áskerı qyzmetshisi, sondaı-aq 300-den astam jaýyngerlik tehnıka, Mı-8 jáne Mı-24 tikushaqtary jumyldyryldy.