Elimizdiń ásem tabıǵaty týraly jazylǵan materıaldarǵa baıqaý jarııalandy
ALMATY. 19 shilde. QazAqparat /Ádilet Musahaev/ - Qazaq Geografııalyq qoǵamy jáne QR Jýrnalıster odaǵy birlesip jýrnalıster men fototilshiler arasynda qorshaǵan orta týraly jazǵan materıaldarǵa baıqaý jarııalady.
Atalǵan baıqaýdyń taqyryby elimizdiń tabıǵaty, tarıhy, qorshaǵan ortany saqtaýǵa zor úles qosqan kórnekti tulǵalar men qarapaıym adamdar jónindegi úzdik materıaldarǵa arnalǵan.
Baıqaý «Qazaqstan tabıǵatyna arnalǵan eń úzdik fotomaterıal», «Qazaqstan tabıǵaty men geografııasy jóninde jazylǵan eń úzdik maqala», «Qazaqstan kórkemóneri jaıyndaǵy eń úzdik maqala», «Ekologııa jaıyndaǵy eń úzdik maqala» jáne taǵy basqa atalymdar boıynsha qazaq jáne orys tilderinde ótedi.
«Bul sharany ótkizýdegi negizgi maqsat elimizdiń jýrnalısterin osy taqyrypta jazýda yntalandyryp, qorshaǵan ortaǵa nazarlaryn aýdartý. Buǵan tek kásibı jýrnalıster ǵana emes, elimizdiń tabıǵat súıetin azamattary da atsalysa alady»,- deıdi Qazaq Geografııalyq qoǵamynyń múshesi, professor Órdenbek Mazbaev.
Sonymen qatar baıqaýǵa 2011 jyl boıynda basylymda ne efırge shyqqan materıaldar qabyldanady. Materıaldar aǵymdaǵy jyldyń 1-shi qazanyna deıin qabyldanyp, 20 qarashada túpki nátıjeler belgili bolady.
Jeńimpazdar Qazaq Geografııalyq qoǵamy men QR Jýrnalıster odaǵynyń maqtaý qaǵazdarymen marapattalyp, 100 myń teńge syıaqy alady. Baıqaýdyń júlde qory 1 mıllıon 400 myń teńge.
