Elimizdiń árbir óńirine arnalǵan sybaılas jemqorlyq táýekelderiniń kartasy ázirlendi
«Árbir oblys jáne respýblıkalyq mańyzy bar qala úshin sybaılas jemqorlyq táýekelderiniń kartasy ázirlendi. Bul - protsesterdiń ashyq bolmaýyna, ákimshilik kedergilerdiń bolýyna, sheneýnikterdiń asyqpaýyna nemese ozbyrlyǵyna, zańnamanyń jetildirilmeýine baılanysty sheshimin tappaıtyn kókeıkesti máselelerdiń tizbesi. Osy negizde jemqorlyq shemalary, qoldanystaǵy normalar men erejelerdiń tasasyna tyǵylǵan máselelerdi zańsyz sheshý múmkindikteri paıda bolady. Dál osy táýekelder kartasy naqty óńirdegi aýmaqtyq organdarymyzdyń jumysyna baǵdar bolýy tıis», - dedi Oljas Bektenov vedomstvonyń alqa otyrysynda.
Onyń atap ótýinshe, endigi ýaqytta vedomstvonyń óńirlik basshylarynyń jumys sapasy birneshe jolmen baǵalanatyn bolady. Atap aıtqanda, birinshi, ishki baǵalaý kezinde qabyldanǵan sharalardyń tıimdiligi qaperge alynady. Sonymen qatar, qyzmetkerlerdiń kásibıligi men paıdaly júktemesi de baǵalanady. Al ekinshi baǵalaý - qoǵamdyq baqylaý. Bul rette óńirdegi naqty basshy qyzmetiniń sybaılas jemqorlyqty jáne «problemalyq» aımaqtardy joıýy qarastyrylady.
«Jıyntyǵynda departament basshysynyń óz jumysyn atqara alatyndyǵy nemese atqara almaıtyndyǵy anyqtalady. Basshy óńirdegi áleýmettik mańyzy bar problemalardy negizge alyp, olardy sheshý boıynsha tıimdi sharalardy usynýy jáne iske asyrýy tıis. Basty krıterıı - nátıjeler óńirdiń azamattary men kásipkerleri úshin mańyzdy jáne paıdaly bolýy kerek», - dedi Oljas Bektenov.