Elimizdiń árbir azamatynyń elektrondy densaýlyq tólqujaty bolady
ASTANA. 23 sáýir. QazAqparat - Elimizdiń árbir azamatynyń elektrondy densaýlyq tólqujaty bolady. Bul týraly búgin QR Úkimetiniń otyrysynda 2013-2020 jyldarǵa arnalǵan Qazaqstan Respýblıkasynda Elektrondy densaýlyq saqtaýdy damytý tujyrymdamasy týraly baıandama jasaǵan QR Densaýlyq saqtaý mınıstri Salıdat Qaıyrbekova málim etti.
Mınıstr Elektrondyq densaýlyq saqtaýdy damytý tujyrymdamasy QR Prezıdentiniń «Qazaqstan-2050» Strategııasy» Joldaýynda kórsetilgen salanyń negizgi basymdyqtaryn, «Salamatty Qazaqstan» memlekettik baǵdarlamasynyń basym baǵyttaryn jáne «Aqparattyq Qazaqstan-2020» memlekettik baǵdarlamasyn esepke ala otyryp ázirlengenin atap kórsetti.
«Tujyrymdamada «elektrondyq densaýlyq saqtaýdy damytý ne úshin kerek?» degen saýalǵa jaýap berilip, aqparattyq tehnologııalardy qoldaný qajettilikteri ashyp kórsetiledi. Jobada elektrondyq densaýlyq saqtaýdyń maqsat-mindetteri jáne salaǵa áser etetin naqty nátıjeler aıqyndalǵan»,- dedi ol.
Onyń aıtýynsha, elektrondy densaýlyq saqtaýdyń ortalyq elementi - elimizdiń árbir azamatynyń elektrondy densaýlyq tólqujaty bolýy tıis. Onda: demografııalyq málimetter; shaldyqqan dertteri týraly málimetter; bıometrıkalyq málimetter; allergologııalyq jáne ımmýndyq dárejesi sııaqty ár adamnyń densaýlyǵyna qatysty jalpy aqparat bolady.
«Aqparat naýqaspen birge júredi» qaǵıdasy iske asyrylady. Ol ýaqytyna jáne meken-jaıyna qaramastan, júrgizilgen dıagnostıkalyq jáne emdeý sharalary, zerthanalyq zertteý nátıjeleri týraly tolyq aqparat alýǵa múmkindik beredi. Elektrondyq densaýlyq tólqujaty negizinde naýqastyń jeke kabınetin ashý josparlanǵan. Ol jerden ár azamat óz densaýlyǵy, dárigerge barýy qajettigi týraly habarlama, skrınıngten nemese profılaktıkalyq tekserýden ótýi tıistigi jóninde málimet taba alady»,- dedi mınıstr.
