Elimizdiń ár azamatynyń tún uıqysy tynysh bolýy tıis - «Aýyl» partııasy

NUR-SULTAN. QazAqparat - «Aýyl» demokratııalyq partıottyq partııasy Qordaıdaǵy qaıǵyly jaǵdaıǵa baılanysty pikir bildirdi, dep habarlaıdy QazAqparat partııanyń baspasóz qyzmetine silteme jasap.

«Qazaqstan - ejelden tatýlyǵy men birligi jarasqan el. Tútini túzý shyǵyp, shańyraǵyn bıik ustaǵan, aǵaıynbyz dep kelgenderdi baýyryna basqan jurtpyz. Qordaıda oryn alǵan keleńsiz jaǵdaı barshamyzdyń janymyzǵa batty. Sútteı uıyp, yntymaǵy jarasyp, bereke-birligi qaınaǵan halyqtyń tynyshtyǵy qashty. Osy oqıǵaǵa qatysty memleket basshysy Q. K Toqaev Qazaq eliniń birligi úshin, Qordaı oqıǵasyna qatysty málimdeme jasady» delingen habarlamada.

Partııa basshylyǵynyń pikirinshe, qazaq halqynyń tynyshtyǵy buzylǵanyn eshkim qalamaıdy. Qazaq aýyly yqylym zamandardan beri birlik pen berekeniń besigindeı bolyp keldi. Bir-birin «ókpege qısa da, ólimge qımaıtyn» aýyldas aǵaıyndardyń arasynda dál mundaı qasiretti jaıdyń oryn alýy barshanyń qabyrǵasyn qaıystyrdy.

«Adam ómiriniń qaýipsizdigi - eń basty qundylyq. Qazynaly qarttan bastap, besiktegi sábıge deıin elimizdiń ár azamatynyń tún uıqysy tynysh bolýy tıis. Biz Qordaı oqıǵasynan qaza tapqan otandastarymyzdyń aǵaıyn-týystary men jaqyndaryna qaıǵysyna ortaqtasyp, kóńil aıtamyz. Jaraqat alǵandardyń saýyǵyp ketýine tilekshimiz. Qaıǵyly jaǵdaıdyń sebepkerleri anyqtalyp, úkimettik komıssııa men quqyq qorǵaý organdary tarapynan zańdy baǵasy beriledi dep oılaımyz», - dep málim etti partııadan.

Ejelden danalyq pen dostyqtyń dástúri berik ornaǵan Qordaı óńiriniń azamattary kóldeneń kelgen azǵyrý men arandatýlarǵa jol bermeıdi dep senetinin aıtady «aýyldyqtar».