Elimizdiń alty oblysynda sý tasýy múmkin - QR ІІM
ASTANA. QazAqparat - Qazaqstannyń alty oblysynda sý tasýy múmkin. Bul týraly búgin Úkimet otyrysynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Aǵymdaǵy jyly sýdyń mol kólemin Aqmola, Aqtóbe, Shyǵys Qazaqstan, Qaraǵandy, Qostanaı jáne Soltústik Qazaqstan oblystarynda boljanyp otyr. Qazirgi kezde elimiz boıynsha táýekel aımaǵyndaǵy 918 eldi meken, 1,5 myńnan astam avtomobıl jáne temir joldar aıqyndaldy»,-dedi mınıstr.
Onyń sózine qaraǵanda, ótken jyly eldi mekenderdi ınjenerlik turǵyda qorǵaý maqsatynda 122 shaqyrym bóget salynyp, 146 shaqyrymyna jóndeý jumystary júrgizildi. Sonymen qatar aǵymdaǵy jyly sý ótkizetin qubyrlardy tazartý jumystary júzege asyrylǵan kórinedi.
«Qazgıdromettiń» óńirlerde júrgizgen monıtorıngi negizinde kóktemde tótenshe jaǵdaıdy aldyn alý boıynsha sharalar jospary ázirlenip, iske asyrylýda. Jergilikti jerlerde TJ-ny joıýǵa qatysty oblystyq, qalalyq, aýdandyq komıssııalardyń otyrystary ótti»,-dedi Qasymov.
Turǵyn úılerdi sý basýǵa jol bermes úshin eldi mekenderdi qardan tazartý jumystary júrip jatyr. Qazirgi kezde 6,2 mln. tekshe metr qar shyǵarylǵan eken.
Mınıstrdiń atap ótýinshe, kóktemgi kezeńge 8 myń tonna janar-jaǵarmaı, 180 myń tonna ınertti materıaldar, 829 myń qap jáne 10 tonna jarylǵysh zat daıarlandy. Kezek kúttirmeıtin shyǵyndar boıynsha tótenshe rezervterge ákimdikter bıýdjetterde 20 mlrd. teńge qarastyryp qoıdy.
