Elimizdiń alǵashqy memlekettik marapattaryn kim ıelendi - Elbasy kitabynan
Tarıhı pýblıtsıstıka janrynda jazylǵan, qazaq jáne orys tilderinde basylǵan Elbasynyń bul eńbegi elimizdiń jańa tarıhy men onyń erteńine degen avtordyń kózqarasyn tanytady. Búgin «QazAqparat» osy kitaptan Qazaqstannyń alǵashqy memlekettik marapattary, olardy kimder ıelengeni jónindegi Elbasynyń estelikterinen úzindi keltirýdi jón kórip otyr.
***
Elge sińirgen eńbegi úshin memlekettik marapattary
Memlekettik marapat pen basqa da belgiler júıesi joǵary sımvoldyq máni bar, memlekettiktiń mańyzdy elementi sanalady. Jańa táýelsiz memleket esebinde Qazaqstan Respýblıkasyna da memlekettik marapattar qajet boldy.
Alǵashqy erekshelik belgilerin jasaýdy men tikeleı óz baqylaýyma aldym, talqylaýǵa usynylǵan jobalardy muqııat zerttep, ózgerister engizdim. 1993 jyldyń 1 sáýirinde «Qazaqstan Respýblıkasynyń memlekettik marapattary týraly» zańǵa qol qoıdym.
Ereksheliktiń joǵarǵy deńgeıi Qazaqstan Respýblıkasy aldyndaǵy kórnekti eńbegi, onyń táýelsizdigi men azamattyǵy jolynda óshpes erlik kórsetkeni úshin beriletin «Halyq qaharmany» ataǵy boldy. Bul ataqty Uly Otan soǵysynyń batyrlary: kombat, sońynan 8-gvardııalyq Panfılov dıvızııasynyń polk komandıri Baýyrjan Momyshuly, Berlınge shabýyldaýshy atqyshtar batalonynyń komandıri Saǵadat Nurmaǵambetov, partızan otrıadynyń komandıri Qasym Qaısenov, mınometshi Alekseı Kýlakov, ushqysh Baqtyoraz Beısekbaev, Reıhstagqa alǵash tý tigýshilerdiń biri - barlaýshy Rahymjan Qoshqarbaev, ushqysh Hıýaz Dospanova, zeńbirekshi Aleksandr Kaporın aldy. «Halyq qaharmany» joǵary ataǵymen ǵaryshkerler - Toqtar Áýbákirov, Talǵat Musabaev pen Aıdyn Aıymbetov te marapattaldy.
Qazaqstannyń alǵashqy ordenderi - «Otan», «Dańq», «Parasat», «Qurmet». Qazaqstannyń alǵashqy medaldary - «Erligi úshin», «Eren eńbegi úshin» jáne «Shapaǵat».
Memlekettik marapat reglamentin belgileıtin jańa zań 1995 jyldyń 12 jeltoqsanynda qabyldandy.
«Halyq qaharmany» ataǵyna teńestirilgen joǵary deńgeıdegi erekshelik belgisi - Qazaqstan Respýblıkasy aldyndaǵy aıryqsha eńbegi úshin beriletin «Altyn qyran» ordeni bolyp tabylady.
Qazaqstan Respýblıkasynyń Prezıdenti osy laýazymǵa saılanǵan soń erekshe úlgidegi «Altyn qyran» ordeniniń ıegeri bolady dep belgilendi. Sondaı-aq bul marapat Reseı Federatsııasynyń Prezıdentteri Borıs Eltsın men Vladımır Pýtınge, Ózbekstan Respýblıkasynyń Prezıdenti Islam Kárimovke, Qytaı Halyq Respýblıkasynyń Tóraǵasy Tszıan Tszenmınge, Japonııa Imperatory Akıhıtoǵa jáne Qazaqstanmen qarym-qatynasty damytýǵa úlken úles qosqan basqa da memleketterdiń kóshbasshylaryna berildi.
2001 jyldyń 3 mamyrynda eldiń qalyptasýy men damýyna sińirgen erekshe eńbegi úshin beriletin «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordeni bekitildi.
2008 jyldyń 1 jeltoqsanynda «Halyq qaharmany» ataǵymen jáne áleýmettik-gýmanıtarlyq damýyndaǵy kórnekti jetistigi úshin beriletin Qazaqstan Respýblıkasynyń joǵary dárejeli erekshe belgisi - «Qazaqstannyń Eńbek Eri» ataǵy bekitildi. Ár jyldary halyq jazýshysy, memlekettik qaıratker Ábish Kekilbaev, belgili kásipker-aýyl sharýashyǵy óndirýshisi Gennadıı Zenchenko, ataqty mýzykant jáne pedagog Aıman Musahodjaeva, kórnekti aqyn jáne qoǵam qaıratkeri Oljas Súleımenov, Qazaqstannyń teatry men kınosynyń maqtanyshy Asanáli Áshimov osy ataqtyń ıegerleri atandy.
Elimizdiń mańdaıaldy uldary men qyzdarynyń áskerı jáne beıbit eńbektegi erligi qashanda bizdiń halqymyz úshin úlgi bolmaq.
