Elimizdiń áleýmettik-ekonomıkalyq damý boljamynyń jobasy maquldandy
ASTANA. Tamyzdyń 31-i. QazAqparat /Arman Asqarov/ - Búgin mınıstrler kabıneti QR Ekonomıkalyq damý jáne saýda mınıstrligi ázirlegen 2011-2015 jyldar aralyǵyndaǵy Qazaqstannyń áleýmettik-ekonomıkalyq damý boljamynyń jobasyn maquldady, dep habarlaıdy QazAqparat.
Atalǵan qujatty tanystyrǵan mınıstr Janar Aıtjanova atap kórsetkendeı, QR 2011-2015 jyldary elimizdegi ınflıatsııa 6-8 paıyzdyń arasynda bolmaq. Qazaqstannyń eksporttyq ónimderine syrtqy suranystyń artýy elimizdiń ónerkásip salasynyń damý deńgeıiniń 2011 jyly - 3,6 paıyzǵa, al 2012-2013 jyldary 3,9 paıyzǵa ósýine yqpal etedi. Osyǵan oraı jumyssyzdar sany 2011 jyly 6,4 paıyzǵa, 2015 jyly 5,5 paıyzǵa tómendeıdi.
«Elimizdiń makroekonomıkalyq boljamyn jasaý barysynda halyqaralyq uıymdardyń álemdik ekonomıkanyń ósimi týraly boljamy jáne Qazaqstannyń munaı, qara jáne tústi metall, sonymen qatar bıdaı sııaqty negizgi eksporttyq taýarlarynyń álemdik baǵasy boıynsha jasalǵan boljamdary eskerilgen. Sondaı-aq bul qujat 2011-2015 jyldary munaıdyń álemdik baǵasy ortasha eseppen 1 barreli 65 AQSh dollaryn quraıdy degen boljammen ázirlengen», dedi J. Aıtjanova.
Úkimet otyrysynyń qorytyndysy boıynsha QR Ekonomıkalyq damý jáne saýda mınıstrligi ázirlegen 2011-2015 jyldar aralyǵyndaǵy Qazaqstannyń áleýmettik-ekonomıkalyq damý boljamynyń jobasy maquldandy.
