Elimizdiń 7 shekaralas óńirindegi aýyldardyń halyq sany azaıyp barady
«Sońǵy 3 jylda Qazaqstannyń shekaralas aýdandarynyń halqy 3,35-ten 3,36 mln adamǵa deıin ósti. Bul rette shekara mańyndaǵy 65 aýdannyń 40-da halyq sanynyń azaıýy baıqalady. Bul kóshi-qon aǵynymen jáne halyqtyń tabıǵı kemýine baılanysty bolyp otyr. Halyq negizinen Aqtóbe, Almaty, Atyraý, Shyǵys Qazaqstan, Abaı, Qostanaı jáne Soltústik Qazaqstan oblystarynyń shekaralas aýdandarynda azaıyp barady», - delingen Ashyq NQA portalynda jarııalanǵan Aýyldyq aýmaqtaryn damytýdyń 2023-2027 jyldarǵa arnalǵan tujyrymdamasynda.
Halyqtyń údere kóshýine basty sebep – tabystyń tómendigi, jumyssyzdyq, kólik qoljetimdiliginiń álsizdigi jáne ınjenerlik ınfraqurylymynyń tozýy.
«Byltyr kóshi-qonnyń teris saldosy Shyǵys Qazaqstan, Túrkistan, Soltústik Qazaqstan jáne Almaty oblystarynda baıqalady. Halyqtyń tabıǵı azaıýy Shyǵys Qazaqstan, Soltústik Qazaqstan jáne Pavlodar oblystarynyń shekaralas aýdandarynda baıqalady. Túrkistan, Almaty jáne Mańǵystaý oblystarynda tabıǵı ósim baıqalady. Shekara mańyndaǵy aýmaqtardyń ekonomıkasy tabıǵı-resýrstyq jáne týrıstik-rekreatsııalyq áleýetti jetkiliksiz paıdalanýmen, qurylymynyń monoprofıldiligimen, shaǵyn jáne orta kásipkerlik sýbektileriniń transshekaralyq faktorlardy paıdalanýdaǵy álsiz belsendiligimen sıpattalady», - dep kórsetilgen qujatta.
Sonymen qatar, tujyrymdamada kórshi eldermen salystyrǵanda shekara mańyndaǵy eldi mekenderdiń áleýmettik-ekonomıkalyq damý kórsetkishteri áldeqaıda tómen ekeni jazylǵan.
