Elimizdiń 6 jasqa deıingi balalaryna qosymsha polıomıelıtke qarsy egý jumystary júrgiziledi - Sh. Jandosov
ALMATY. 20 sáýir. QazAqparat /Ádilet Musahaev/ - Elimizdiń Bas sanıtarlyq dárigeri Keńes Ospanovtyń qaýlysymen mamyrdyń 3-7 aralyǵynda elimizdiń 6 jasqa deıingi balalaryna qosymsha polıomıelıtke qarsy egý jumystary júrgiziledi.
Bul jaıynda búgin Sanıtarlyq-epıdemıologııalyq saraptama jáne monıtorıng ǵylymı-tájirıbelik ortalyǵynyń dırektory Shalǵynbaı Jandosov Almatyda ótken baspasóz máslıhaty kezinde málim etti.
Sh. Jandosov dúnıejúzilik densaýlyq saqtaý uıymy vaktsınatsııa jáne «Taza sý» baǵdarlamasy adam densaýlyǵynyń sapasyn saqtap qalýǵa yqpal etetindigin alǵa tartýda, deıdi.
Sonymen qatar ol osy turǵyda bir apta buryn elimizdiń dáriger, ǵalymdary, meshit jáne shirkeý ókilderimen birlesip dóńgelek ústel ótkizgendigin aıtady. Ol din ókilderin shaqyrýdaǵy sebebin kóptegen adamdar byltyr polıomıelıtke qarsy balalaryn ekkizýden bas tartqandyǵymen túsindirdi. «Byltyr Mańǵystaý oblysynda bolǵan kezimde kórshiles Ózbekstannan kelgen oralman baýyrlarymyz balalaryn ektirýge qarsy bolyp, quranda ondaı jazylmaǵan degendeı ýájderin aıtyp jatty. Tipten aýdandyq ákimnen oblystyq ákimdikke deıin yqpal jasap, ımamdardy úılerine ertip aparyp, bul ekpeniń adam ómirine mańyzdylyǵyn túsindirgen bolatynbyz», -deıdi Sh. Jandosov.
Polıomıelıt - óte qaýipti juqpaly, adam júıkesin zaqymdap, sal aýyrýyna ákep soǵatyn aýrý túri. Sondyqtan alda ótetin shara barysynda 1 mln. 900 myń bala egiledi dep josparlanýda eken.
Sh. Jandosovtyń aıtýynsha, bul ekpe jumystary tikeleı Densaýlyq saqtaý mınıstrliginiń tapsyrmasymen júrgizilmek. «Ekpe jumystaryna deıin búkil aýyldyq jáne qalalyq aımaqty ne maqsatta, qaı ýaqytta egiletindigi jaıynda tolyqtaı qulaqtandyratyn bolamyz. Byltyr kórshi Tájikstan elinde úlken keleńsiz jaǵdaı oryn aldy. Der kezinde egý jumysy júrgizilmegendikten balalardyń kóbi polıomıelıtpen aýyryp, onyń keıbiri elimizge enip ketti. Degenmen densaýlyq saqtaý salasynda jumys istep júrgen dárigerlerdiń arqasynda jalǵyz naýqaspen shekteldik», - deıdi ol.
Elimiz boıynsha túrli juqpaly aýrýlarǵa qarsy ekpe jumystaryna qyrýar qarjy bólinýde. Tek gepatıtke qarsy egý jumystaryna 600 mln. teńge bólinse, tumaý aýrýyna da 600 mln. teńgege jýyq aqsha aýdarylǵan. Úkimet tarapynan 2005-2010 jyldarǵa arnalǵan «Taza sý» baǵdarlamasy qolǵa alynyp, oǵan 482 mlrd. teńge bólinip, qomaqty jumystar atqarylǵan.
