Elimizdiń 6 óńirinde ónerkásip óndirisiniń kólemi tómendedi

ASTANA. QazAqparat – Qazaqstandyq ónerkásip oryndary bıyl qańtarda 3 653 mlrd teńgeniń ónimin óndirdi. Onyń ishinde ken óndirý salasyna tıesili úles 1 881 mlrd teńge bolsa, 1 470 mlrd teńge óńdeý ónerkásibinen keldi. Bul týraly QazAqparat tilshisi Ulttyq statıstıka bıýrosyna silteme jasap habarlaıdy.

USB usynǵan málimet boıynsha óńdeý ónerkásibinde óndiris kólemi artqan. ıAǵnı ótken jyldyń sáıkes kezeńimen salystyrǵanda 1,6%-ǵa ósim baıqaldy.

Óndiris kólemindegi oń dınamaıka elimizdiń 14 óńirinde tirkeldi. Al Aqtóbe, Batys Qazaqstan, Qaraǵandy, Qostanaı, Shyǵys Qazaqstan oblystary men elordada kórsetkishter kerisinshe tómendegen.

Ónerkásiptiń negizgi salalarynyń ishinde elektr energııasy, gaz, bý, ystyq sý jáne aýa baptaýmen baılanysty jabdyqtaýda aıtarlyqtaı ósim baıqalǵan.