Elimizdiń 6 óńirinde qandastarǵa kómek kórsetetin front-keńseler ashylady
«Qoǵam úshin erekshe mańyzy bar taǵy bir baǵyt – qandastar máselesi. Ózderińizge málim, Qazaqstan sheteldegi dıasporasyn Otanyna shaqyrǵan álemdegi sanaýly memleketterdiń qatarynda. Bul maqsatta, mınıstrlik janynan «Otandastar» qory qurylyp, naqty jobalar júıeli júrgizilip keledi. Búginde álemniń 12 elindegi qazaq qaýymdastyǵynyń suraýymen qazaq tilin oqytatyn 31 onlaın synyp jumys jasaıdy. Mádenı-gýmanıtarlyq baılanysty kúsheıtý maqsatynda 5 memlekette «Abai Uii» qazaq mádenı-iskerlik ortalyqtary ashyldy», - dedi mınıstr.
Onyń atap ótýinshe, elge oralǵan qandastardy jańa ortaǵa beıimdeý jumysy da bir júıege keltirildi. Qandas mártebesi men azamattyq alý rásimin jeńildetetin «bir tereze» prıntsıpi jobasy búginde tolyq pysyqtaldy. Atalǵan protsedýra Halyqqa qyzmet kórsetý ortalyqtary arqyly jaqyn arada qoljetimdi bolady.
«Elimizdiń 10 óńirinde «Otandastar» qorynyń front-ofısteri jumys isteýde. Taǵy 6 óńirde front-ofıster ashylady. Ortalyqta jańadan elge kelgen qandastarǵa durys qujat rásimdeýden bastap olardy memlekettik qoldaýdyń barlyq suraqtary boıynsha quqyqtyq, aqparattyq kómek beriledi. Byltyr 5 myńnan astam ótinishke naqty kómek kórsetildi. Jalpy, osynaý saýaby mol abyroıly mindettiń údesinen shyǵý úshin mınıstrlik ınstıtýtsıonaldyq turǵydan da, quqyqtyq baǵytta da qyzmet etýge qashanda daıar. Dese de, bul jumysta eń bastysy – dúnıe júzine tarydaı shashylǵan qandastarymyzdy elge kóshirý ǵana emes, olardyń álemniń qaı túkpirinde júrse de ulttyq múddelerin qorǵaý, qamqor bolý», - dedi Aıda Balaeva.
