Elimizdiń 53 qalasynda kárizdik-tazartý qondyrǵylary salynady
«Elbasynyń tapsyrmasyna sáıkes elimizdiń 53 qalasynda kárizdik-tazartý qondyrǵylaryn salý jáne jańǵyrtý jobalaryn iske asyrýǵa daıyndyq júrgizip jatyrmyz. Halyqaralyq qarjy uıymdarymen shamamen 330 mlrd teńge mólsherinde bıýdjetten tys qarajat tartý boıynsha kelisimge keldik», - dedi Beıbit Atamqulov.
Onyń aıtýynsha, 5 qalada atap aıtqanda, Balqash, Jańatas, Jezqazǵan, Sátbaev, Stepnogorskide kárizdik-tazartý qondyrǵylaryn salý men rekonstrýktsııalaý boıynsha tehnıkalyq-ekonomıkalyq negizdeme ázirlendi. Saraptama oń qorytyndysyn berdi. Bul jobalardy shamamen 40 mlrd teńge mólsherinde Azııa damý banki qaryzy esebinen iske asyrý josparlanǵan.
«6 qala - Aqtóbe, Aıagóz, Qapshaǵaı, Qaraǵandy, Prıshahtınsk, Rıdder boıynsha tehnıkalyq-ekonomıkalyq negizdeme ázirlenip, saraptamaǵa jiberildi. Quny shamamen 90 mlrd teńge bolatyn ol jobalardy Eýropalyq qaıta qurý jáne damý bankiniń qarajaty esebinen iske asyrý josparlanǵan. Álemdegi pandemııaǵa baılanysty jobalardy iske asyrý 2021 jyldyń birinshi jarty jyldyǵyna aýystyryldy», - dedi mınıstr.
