Elimizdiń 5 qalasynda radıatsııalyq onkologııa ortalyqtary ashylady

Bul týraly búgin Astanada ótip jatqan Onkologtar men radıologtardyń VII sezi aıasynda rm.kz saıtyna bergen suhbatynda  Qazaq onkologııa jáne radıologııa ǴZI dırektorynyń orynbasary Dáýlet Baıpeıisov málim etti.

«Búgingi kúni kóptegen qazaqstandyqtar shetelderge baryp, Qazaqstanda qoljetimsiz emdeý túrlerin alady. Osy jaǵdaıdy ózgertý úshin Aqtóbe, Astana, Qaraǵandy, Almaty jáne Semeı qalalarynda medıtsınalyq JOO bazasynda joǵary tehnologııaly 5 radıatsııalyq onkologııa ortalyqtary  ashylatyn bolady», - dedi D.Baıpeıisov.

Onyń aıtýynsha,  radıatsııalyq onkologııa ortalyqtary medıtsınalyq  sáýlelik terapııa qondyrǵylarymen jaraqtalady. Ár ortalyq 2-3 oblysty qamtyp, sol arqyly barlyq óńirlerdiń halqyna  qajetti járdem kórsetiledi.  Budan basqa, Semeı qalasyndaǵy onkologııalyq dıspanser bazasynda 2013 jyldyń sońynda  óz jumysyn bastaıtyn ıadrolyq medıtsına ortalyǵy salynýda, Almatydaǵy onkologııalyq ınstıtýt bazasynda da 2014 jyly ıadrolyq medıtsına ortalyǵy qurylady. Búgingi kúni Astanadaǵy Respýblıkalyq dıagnostıkalyq ortalyǵynda osyndaı ortalyq jumys istep tur.   Baǵdarlama boıynsha protondy terapııany, sondaı-aq barlyq damyǵan elderde qoldanylatyn emdeýdiń basqa da ınnovatsııalyq ádisterin damytý kózdelýde. «Atalǵan barlyq  ádistemeler men tehnologııalar onkologııalyq naýqastar arasyndaǵy ólimdi azaıtyp, ómir jasyn uzartýǵa baǵyttalǵan», - dep qorytyndylady sózin D.Baıpeıisov.

Esterińizge sala keteıik, Memleket basshysynyń tapsyrmasy boıynsha Qazaqstanda onkologııalyq járdemdi damytýdyń 2012-2016 jyldarǵa arnalǵan baǵdarlamasy júzege asyrylýda.  Baǵdarlamanyń maqsaty aldyn alý jáne joǵary tehnologııalardy engizý arqyly onkologııalyq naýqastar arasyndaǵy ólimdi azaıtyp, ómir jasyn uzartý  bolyp tabylady.