Elimizdiń 4 oblysynda úsik júredi - sınoptıkter
ASTANA. QazAqparat - 14 qyrkúıek kúni Qazaqstannyń basym bóliginde jaýyn-shashynsyz aýa raıy saqtalady. Respýblıkanyń tek soltústiginde frontaldyq bólikterdiń ótýine baılanysty jańbyr jaýyp, keı jerlerde naızaǵaı oınaıdy. Jekelegen aýmaqtarda jel kúsheıedi. Ońtústikte oǵan shańdy daýyl aralasady. Shyǵysta jáne ońtústik-shyǵysta tuman kútiledi, dep habarlaıdy QazAqparat «Qazgıdromet» RMK-ǵa silteme jasap.
Atap aıtqanda, Soltústik Qazaqstan oblysta kúndiz 15-20 m/s jyldamdyqpen soqqan jeldiń ekpini 23-28 m/s kúsheıedi.
Pavlodar oblysynyń keı jerlerinde túnde, basym bóliginde kúndiz jel 15-25 m/s artady.
Aqmola, Jambyl, Túrkistan, Qyzylorda, Qostanaı oblystarynyń, kúndiz Atyraý oblysynyń keı jerlerinde jeldiń jyldamdyǵy 15-20 m/s jetedi. Qyzylorda oblysynda oǵan shańdy daýyl aralasady.
Jambyl, Shyǵys Qazaqstan oblysynyń keı jerlerinde tuman kútiledi.
Túnde Jambyl, Almaty, Shyǵys Qazaqstan oblystarynyń keı jerlerinde 1-3 gradýs úsik júredi. Al Qaraǵandy oblysynda 1-6 gradýs úsik boljanady.
