Elimizdiń 30 joǵary oqý ornynda qazaq kúresiniń bapkerleri daıyndalady

Ulttyq sport túrleri kafedrasynyń meńgerýshisi, pedagogıka ǵylymynyń kandıdaty, QR Eńbek sińirgen jattyqtyrýshysy, sport sheberi Erǵalı Muhıtdınovtyń aıtýynsha, jastardyń sportqa degen qyzyǵýshylyǵyn oıatyp, sportta ǵana emes, ómirde de bıik jetistikterge umtylýyna kásibı bapkerlerdiń qosar úlesi qomaqty. Qazir bapkerlikpen aınalysyp júrgen mamandar arasynda ártúrli salanyń ókilderi bar. Olardyń bárin birdeı kásibı maman deýge bolmaıdy.

«Búgingi tańda elimizdiń 30 joǵary oqý ornynda qazaq kúresinen bapkerler daıyndalady. Alaıda, onyń bárinde birdeı joǵary kásibı mamandar jumys istep jatyr dep aıta almaımyn. Óz salasynda kásibı biliktilik alyp, arnaıy dıplom alǵan jattyqtyrýshylar tek bizde ǵana jumys jasaıdy. Jalpy sportshynyń boıyndaǵy qabiletin tolyq ashyp kórsetý úshin bapkerdiń kásibı biliktiligi joǵary bolý kerek. Sporttyń qyr-syryna qanyq bolǵanmen, kez kelgen jattyqtyrýshy onyń syryn óz shákirtine túgel ashyp jetkize almaıdy», - deıdi E.Muhıtdınov.

Akademııa qabyrǵasynda ulttyq sport túrleri kafedrasy 2009 jyly ashyldy. Qazir onda sporttyń saıatshylyq, toǵyzqumalaq, qazaq kúresi, kókpar, qyz qýý, aýdaryspaq, jekpe-jek túrleri boıynsha bapkerler daıyndalady. Jalpy bul oqý ornynda 1973 jyly tuńǵysh ret Kúres túrleri kafedrasynan qazaq kúresi bólimi ashylǵan bolatyn.

«Qazir qazaq kúresinen halyqaralyq, qurlyqtyq jáne álem chempıonattary ótip júr. Oǵan degen qyzyǵýshylyq kún ótken saıyn artyp keledi. Degenmen, ony búkil álemge tanytý úshin elimiz shet elderge bilikti bapkerlerin jiberip, jattyqtyrýshylar daıyndaýǵa erekshe mán berýi kerek sııaqty. Óıtkeni qazir shet el turmaq Qazaqstannyń ózi túgel kásibı jattyqtyrýshylarmen qamtamasyz etilmegen. Aýyldyq jerlerde mamandar tapshy. Eger úkimet tarapynan tapsyrys kólemi ulǵaıatyn bolsa, aýyldyq jerlerden keletin stýdentter qajetti mamandyqty ıgerip, óz eliniń, jeriniń gúldenýine qomaqty úles qosary kúmánsiz», - deıdi professor Erǵalı Muhıtdınov.