Elimizdiń 3 óńirinde kóktemgi egistik jumystary júrgizilip jatyr
«Osy jyldyń 29 naýryzyndaǵy jaǵdaı boıynsha Almaty, Qyzylorda jáne Túrkistan oblystarynda aýyl sharýashylyǵy daqyldaryn egý jumysy júrip jatyr. Atap aıtqanda, 67,7 myń gektarǵa jazǵy masaqty dándi daqyldar, 6,5 myń gektarǵa kartop, 10,3 myń gektarǵa kókónis daqyldary, 18,7 myń gektarǵa kópjyldyq shóp egildi. Oblys ákimdikteriniń aqparatyna sáıkes, búginde 2,4 mln tonna tuqym quıylǵan. Bul jospardyń 100,2 paıyzy», - dedi mınıstr.
Onyń atap ótýinshe, 2021 jyly tuqym sharýashylyǵyn qoldaýǵa 11,8 mlrd teńge bólindi. Bul elıta tuqymdaryn qoldaný mólsherin 7,4 paıyzǵa arttyrýǵa múmkindik beredi.
«Mıneraldy tyńaıtqyshtar satyp alýdy sýbsıdııalaýǵa oblystardyń jergilikti bıýdjetinen 26,1 mlrd teńge kózdelgen. Osynyń arqasynda mıneraldy tyńaıtqyshtar qoldaný mólsheri 3,3 paıyzǵa artty. Oblys ákimdikteriniń jedel aqparaty boıynsha búginde respýblıka dıqandaryna kóktemgi dala jumystaryn júrgizý úshin 117,6 mln tonna mıneraldy tyńaıtqysh jetkizilgen. Qazirgi ýaqytta Almaty, Qostanaı, Jambyl, Túrkistan oblystarynda sýbsıdııalaýǵa arnalǵan ótinim qabyldanyp jatyr. Jaqyn arada ótinim qabyldaý Batys Qazaqstan jáne Soltústik Qazaqstan oblystarynda bastalady. Qalǵan oblystarda sýbsıdııalar tizbeleri men normalardy bekitý jumystary aıaqtalyp qaldy», - dedi ol.
Saparhan Omarovtyń dereginshe, bıyl pestıtsıdti sýbsıdııalaýǵa oblystardyń jergilikti bıýdjetinde 30,6 mlrd teńge kózdelgen. Bul byltyrǵy jylǵa qaraǵanda 15,8 paıyzǵa kóp jáne qolaıly fıtosanıtarlyq jaǵdaıdy qamtamasyz etýge múmkindik beredi.