Elimizdiń 17 jasqa deıingi jasóspirimder quramasy jańadan jasaqtalady - aǵa jattyqtyrýshy
ALMATY. 14 aqpan. QazAqparat /Erlik Erjanuly/ - Qazir osydan 20-30 jyl burynǵy jattyǵýdyń ózektiligi joıyldy. Qazir jasóspirimderdiń qyzyǵýshylyǵy múlde basqa, olar aıtarlyqtaı jetilgen.
Osyny basshylyqqa alý kerek. Bul týraly fýtboldan Qazaqstannyń 17 jasqa deıingi jasóspirimder quramasynyń jańadan taǵaıyndalǵan aǵa jattyqtyrýshysy Olıver Peltser búgin Almatyda ótken baspasóz máslıhatynda aıtty.
«Komanda 6 aptanyń ishinde jańadan qaıta jasaqtalady. Qazir burynǵy quramadaǵy 18 oıynshydan tek bireýi ǵana qaldy. Ol ótken jylǵy eń jas fýtbolshy bolyp otyr. Myqtylardy aldaǵy kúnderi Brazılııanyń Ole Brazıl mektebiniń tárbıelenýshilerimen bolatyn oıyndarda kóretin bolasyzdar. Negizgi jarys sáýir aıynda ótetin Prezıdent kýbogynda bolady", - deıdi Olıver Peltser.
Qazaqstan Fýtbol federatsııanyń vıtse-prezıdenti Vıktor Katkovtyń sózine qaraǵanda, Federatsııa 17 jasqa deıingi jasóspirimder qurasynyń maýsym aıynda Bakýde ótetin Kaspıı kýbogy men tamyzda Lıtvada bolatyn halyqaralyq týrırge qatysýyna kelisim berip otyr. Jalpy, qazirgi tańda baıqaýǵa shaqyrylǵan 50 jasóspirim Almatyda oqý-jattyǵý jıynynda júr.
