Elimizdiń 11 azamaty Lıvııadan ketip úlgerdi - SІM
ASTANA. 25 aqpan. QazAqparat - Qazaqstannyń Trıpolıdegi Dıpmıssııasynyń 25 aqpandaǵy aqparatyna sáıkes, qazirgi ýaqytta elimizdiń 11 azamaty Lıvııadan ketip úlgerdi,
dep habarlady QR SІM baspasóz qyzmetinen.
«Olardyń 4-eýi - Maltaǵa, 1-eýi - Ulybrıtanııaǵa shyǵaryldy. 6 otandasymyzdyń 2-eýi - Reseı bortymen Máskeý arqyly, 4-eýi - Ýkraına bortymen Kıev arqyly Qazaqstanǵa keldi. Máskeý men Kıevtegi Qazaqstan Elshilikteri tarapynan bul azamattardy qarsy alý, SІM esebinen qonaqúıge ornalastyrý jáne Almatyǵa ushaqqa bılet alý jumystary atqaryldy», - delingen baspasóz habarlamasynda.
Vedomstvonyń atap ótýinshe, qazirgi kezde Lıbııada qalǵan 4 qazaqstandyq stýdent (olarmen birge oqıtyn 3 Qyrǵyzstan azamaty) Dıpmıssııa kómegimen Trıpolı áýejaıyna jetkizilip, Ýkraınanyń ekinshi bortymen Kıevke ushýǵa daıyndalýda.
Jerorta teńizindegi aýa raıynyń turaqsyzdyǵyna baılanysty Túrkııanyń arnaıy keme borty Trıpolı teńiz portynan shyǵý múmkindigin kútýde. Sońǵy málimetke sáıkes, onda qazaqstandyq 2 azamatsha bar. Sondaı-aq, Saharadaǵy № 103 burǵylaý stansyndaǵy «Schlumberger» (Shlıýmberje) kompanııasynyń jáne «Hamada» burǵylaý ken ornyndaǵy «Eriell» kompanııasynyń qazaqstandyq 3 qyzmetkerlerin evakýatsııalaý máselesi atalǵan kompanııalardyń basshylyǵymen sheshilý ústinde. Qazirgi ýaqytta Dıpmıssııa Lıbııada qalǵan azamattarymyzdy evakýatsııalaý úshin tıisti jumystar atqarýda.
