Elimizdiń 10 óńirinde pııaz baǵasy turaqtandy
Bul týraly QazAqparat QR Saýda jáne ıntegratsııa mınıtsrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, ótken senbide Serik Jumanǵarın barlyq ákimdikterge turaqtandyrý qorlarynan saýda jelilerine shyǵarylatyn kókónisterdiń kólemin barynsha ulǵaıtýdy tapsyrdy.
Saýda komıtetiniń málimetinshe, 2023 jylǵy 7 naýryzdaǵy jaǵdaı boıynsha kókónisterdi satýdyń jalpy kólemi 19688,22 tonnany qurady, onyń ishinde kartop – 7559 tonna, sábiz – 3935,2 tonna, pııaz – 5234,72 tonna, qyryqqabat – 2959,3 tonna.
Jalpy saýda oryndarynyń sany 727-den 892-ge deıin ósti. Shymkent (5-ten 25-ke deıin), Jambyl (58-den 63-ke deıin), Jetisý (53-ten 55-ke deıin), BQO (27-den 56-ǵa deıin), Qostanaı (21-den 52-ge deıin), Qyzylorda (51-den 54-ke deıin), Mańǵystaý (26-dan 29-ke deıin), Pavlodar (23-ten 59-ǵa deıin), Túrkistan (4-ten 23-ke deıin), Ulytaý (19-dan 34-ke deıin) óńirlerinde qosymsha saýda oryndary ashyldy.
Statıstıkaǵa sáıkes, pııaz baǵasynyń ósý dınamıkasy aıtarlyqtaı turaqtandy. Baǵanyń ósimi boıynsha antılıderler qatarynda bolǵan Astana qalasy men Ulytaý oblysynda baǵa birshama tómendese, 10 óńirde baǵa turaqtandy. Ósim Almaty, Aqmola, Almaty, Jetisý, Jambyl, Qaraǵandy, Pavlodar, Túrkistan óńirlerinde jalǵasýda, bul baǵanyń ósýin tejeý boıynsha tıimsiz jumys deńgeıin kórsetedi. Kartop baǵasy tek Túrkistan oblysynda, sábiz baǵasy – Astana qalasy men Atyraý, Almaty, Ulytaý oblystarynda, qyryqqabat baǵasy– Astana qalasy men Aqtóbe oblysynda tómendedi.
Keńeste Serik Jumanǵarın saýda jelileriniń ókilderinen turaqtandyrý qorlarynan kókónisterdi jetkizýde qandaı da bir máseleler bar ma dep surady. Aqtóbe oblysynyń saýda jelileri ókilderi jetkiziletin pııaz kóleminiń azdyǵyn aıtty, 6 tonnaǵa suranys kezinde aptasyna 2 tonna keledi. Osyǵan uqsas máselelerdi basqa óńirlerdiń ókilderi de kóterdi.
«Biz óńirlerdiń ákimdikterimen osy máselelerdi pysyqtap, qor tapshylyǵy kezinde ońtústik óńirlerden keletin jetkizilimderdi qaıta baǵdarlaımyz. Bir apta buryn Tájikstannan delegatsııa elge oralyp, qoljetimdi baǵamen 6,5 myń tonna pııazǵa kelisimshart jasaldy, biraq bul maýsymaralyq kezeńge jetkiliksiz. Tájikstandyq óndirýshiler úlken kólemdegi kelisimsharttarǵa daıyn. Onyń ústine Tájikstan temirjoly óz ýchaskeleri boıynsha tasymaldaý tarıfine 80% jeńildik beredi. Qyrǵyzstan qyryqqabatty arzan baǵamen jetkizýge daıyn. Sondaı-aq Ózbekstannan erte shyǵatyn kókónisterdi jetkizýdiń «jasyl dálizi» týraly kelisim bar», — dedi Serik Jumanǵarın.
