Elimizdiń 10 óńirinde qurylys kólemi artty
NUR-SULTAN. QazAqparat – Elimizdiń 10 óńirinde qoldanysqa berilgen turǵyn úı kólemi artty. Bul týraly QazAqparat Primeminister.kz saıtyna silteme jasap habarlaıdy.
«Bul salada 620 myńnan astam adam jumys isteıdi. Elimizdegi turǵyn úı qurylysynyń qarqyny jyl saıynǵy ósýdiń oń qarqynyn saqtap tur. 2019 jyly 13,1 mln sharshy metr salyp, paıdalanýǵa berý josparlanǵan. Onyń 5,7 mln sharshy metr osy jyldyń birinshi jarty jyldyǵynda paıdalanýǵa berildi. Bul jyldyq jospardyń jartysyna jýyǵy nemese 43,5 paıyzy degen sóz. Ótken jylmen salystyrǵanda, qoldanysqa berilgen turǵyn úı kóleminiń artýy 10 oblysta baıqalǵan. Olar – Túrkistan, Qyzylorda, Almaty, Qostanaı, Atyraý, Aqtóbe, Soltústik Qazaqstan, Aqmola, Jambyl, Pavlodar oblystary. Al jalpy qurylys qarqyny boıynsha Qyzylorda, Qaraǵandy, Atyraý, Shyǵys Qazaqstan, Batys Qazaqstan, Túrkistan, Jambyl, Pavlodar oblystary jáne Almaty qalasy kósh bastap tur», - deıdi QR Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Almaz Ydyrysov.
Suhbat barysynda Almaz Ydyrysov 4 óńirde kórsetkishterdiń tómendegenin aıtty.
«Nur-Sultan qalasynda Nazarbaev Ýnıversıtetiniń nysandary men kóp páterli turǵyn úılerdiń qurylysynyń aıaqtalýyna baılanysty jumys kólemi azaıdy. Shymkentte qurylys jumystarynyń tómendeýi transformator zaýytynyń qurylysy boıynsha jumystardyń azaıýyna, Shymkent munaı óńdeý zaýytyndaǵy jumystardyń aıaqtalýyna, joldar men kóp páterli turǵyn úılerdiń qurylysyna baılanysty boldy. Mańǵystaý oblysynda avtojoldardy rekonstrýktsııalaý jáne Quryq portynda óndiristik keshender salý jumystarynyń aıaqtalýyna baılanysty qurylys jumystarynyń kólemi azaıdy», -deıdi vedomstvo ókili.
