Elimizdi jaıaý aralaǵan aqsaqaldyń saıahaty Gınneske tirkelýi múmkin
ASTANA. QazAqparat – Ulytaýlyq 72 jastaǵy Sársenbaı Qotyrashov elimizdiń barlyq aımaǵyn jaıaý aralap shyqty. Aqsaqal sapar barysynda 8 myń shaqyrymnan astam joldy baǵyndyrdy, dep habarlaıdy QazAqparat tilshisi.
Marafonshy atamyz jaıaý saparyn bıyl naýryzda bastap, keshe Aqtaýda aıaqtady.
«Men saparǵa rekord jasaımyn dep shyqqan joqpyn. Maqsatym – týǵan jerdi jaıaý aralaý boldy. Eger rekord retinde tirkep jatsa qarsy emespin, bermeı jatsa da renishim joq», - dedi Sársenbaı Qotyrashev.
Sondaı-aq, aqsaqal sapar barysynda qoldaý-kómek kórsetken barsha janǵa alǵysyn aıtty.
Odan bólek, aldaǵy jyly álem elderin aralaý josparyn tilge tıek etti.
«Endi dúnıe júzin jaıaý aralaý maqsatyn kózdep otyrmyn. Buıyrsa, kelesi jazda jolǵa attanam. Álemdi jaıaý aralaý marafonyn Ázerbaıjannan bastap odan ári Eýropa elderi jáne AQSh-qa barmaqpyn. Sondaı-aq, tizimde Qytaı men Mońǵolııa bar», - deıdi ol.
«Bıyl mamyrda Qazaqstandaǵy Gınnes rekordtar kitabynyń ókilderimen kezdestik. Atamyzdyń marafondy bastaǵanyn aıtyp, habardar ettik. Keshe Aqtaýda sapar aıaqtalǵan soń taǵy bir habarlastym. Olar aqsaqaldyń saparyn qadaǵalap otyrǵandaryn aıtyp, Gınnes rekordtar kitabyna kiredi dep otyr. Sebebi 72 jasynda atamyz sekildi az ýaqyttyń ishinde 8 myń shaqyrymdy áli eshkim baǵyndyrmapty», - deıdi ulytaýlyq aqsaqaldyń kómekshisi Baqtııar Qojahmetov.
Aıta keteıik, Qazaqstan aýmaǵyn jaıaý aralap shyqqan Sársenbaı Qotyrashov búgin elordaǵa keldi.
Eske sala keteıik, QazAqparat ulytaýlyq 72 jastaǵy qarttyń jaıaý marafony bastalǵaly habar taratyp keledi.
Jaıaý sapar bıyl naýryzda Ulytaýdan bastalǵan edi.
Jazda 4 myń shaqyrymdy jaıaý baǵyndyryp elordaǵa jetken aqsaqalmen tildestik.
Sondaı-aq, aqsaqal sapary barysynda qymyz meıramyn jandandyrý kerektigin aıtyp júr.
