Elimizdi úzdiksiz elektr energııasymen qamtamasyz etetin birqatar joba júzege aspaq
STANA. Qazannyń 1-i. QazAqparat /Marlan Jıembaı/ - Búgin elordada ótken baspasóz máslıhaty barysynda Indýstrııa jáne jańa tehnologııalar vıtse-mınıstri Dúısenbaı Turǵanov elimizdi úzdiksiz elektr energııasymen qamtamasyz etetin birqatar jobanyń qurylysy jaıynda egjeı-tegjeıli baıandap berdi.
Qazirgi ýaqytta atalǵan salada 14 jobanyń sátti júzege asyrylyp jatqandyǵyn aıtqan ol «qýaty 18MVt-ty quraıtyn Oral gaz týrbınaly elektr stansysy iske qosyldy. Tolyqtaı alǵanda biz jyl sońyna deıin tolyq kólemde elektr beredi dep kútip otyrmyz. Ol shamamen 54 MVt-ty quraıdy. Sondaı-aq qýaty 3,5MVt-ty quraıtyn Qaratal sý elektr stansysy da iske qosyldy», dedi.
Onyń atap ótýine qaraǵanda, qazannyń 12-sinde Balqash jylý elektr stansysynyń qurylysy boıynsha Qazaqstan men Soltústik Koreıa arasynda úkimetaralyq kelisimge qol qoıylǵan. Qazirdiń ózinde Balqash jylý elektr stansysynyń temir jol, temir jol beketi, sý qubyry syndy ınfraqurylymdarynda qurylys jumystary jandaný ústinde. Nysan iske qosylǵannan keıin 1320 MVt elektr energııasyn beretin bolady.
Al Moınaq sý elektr stansysy, Ekibastuz GRES-2 úshinshi energoblogy jáne 500 kVt-tyq «Alma» stansysy qurylystary belgilengen keste boıynsha júrgizilýde. Ekibastuz GRES-1-diń №8 blogyn, qýattylyǵy 325 MVt-tyq Aqsý GRES-iniń № 2 blogyn qalpyna keltirý jáne Shardara sý elektr stansysyn jańartý jumystary jalǵasýda.
«Jyl sońyna deıin Atyraý jylý elektr ortalyǵyn qosymsha 50 MVt-qa keńeıtý jobasyn aıaqtaýdy josparlap otyrmyz. Sonymen qatar taıaý aılarda 2011 jylǵy qysqy Azıada nysandaryn elektr energııasymen jabdyqtaıtyn Almaty qalasy men Almaty oblysyndaǵy Ermensaı, Medeý, Shymbulqaq, QazMÝ transformatorlyq stansylarynyń qurylysyn aıaqtaıtyn bolamyz», dep túıindedi sózin vıtse-mınıstr.
