Elimizdi biriktirip turǵan úlken qundylyq bar ekenin umytpaýymyz qajet – Roza Rymbaeva
Ánshiniń keshi Respýblıka kúnine oraılastyrylǵan. Halyq ártisiniń ónerin tamashalaýǵa 3 myńǵa jýyq kórermen jınaldy. Kelýshilerge jyly lebizin bildirgen Roza Rymbaeva ulttyq qundylyqtarymyzdy umytpaý qajettigin atap ótti.
«Qurmetti kórermen, talǵampaz tyńdarman altyn kúzde, arqanyń tórinde sizdermen kezdesip otyrǵanyma óte qýanyshtymyn. Osyndaı ádemi shaqta ózderińizben jolyǵýǵa múmkindik jasaǵan Astana qalasynyń ákimdigi men mádenıet basqarmasyna alǵys aıtamyn. Biz elimizdi biriktirip turǵan úlken qundylyq bar ekenin umytpaýymyz qajet. Ol – babalarymyzdan amanat bolyp qalǵan atamekenimiz. Sondyqtan elimiz úshin eń mańyzdy mereke – Respýblıka kúni qutty bolsyn!», - dep Respýblıka kúnimen qazaqstandyqtardy quttyqtady Roza Rymbaeva.
Kontsertte ánshiniń patrıottyq baǵyttaǵy ánderi jıi shyrqaldy. Merekelik keshti tamashalaýǵa qala qonaqtary men turǵyndarynan ózge, elimzge tanymal óner adamdary keldi.
«Men Roza Qýanyshqyzymen 1999 jyly alǵash ret tanysqanmyn. Ol joly biz birlesken albom jazǵan edik. Tarıhtan biletinimizdeı, ańyz adamdar kóbine óner jolynan alystaı bastaıdy. Biraq Roza Qýanyshqyzy naǵyz maman ekenin dáleldep keledi. Ol kisi búginge deıin ózin damytýdan, jetildirýden taıǵan emes.
Sonymen qatar, búgin aıtýly data – Respýblıka kúni, ulttyq merekemiz. Ol araǵa jyldar salyp, óziniń tarıhı orynyn tapty. Oǵan biz qýanyshtymyz. Osy múmkindikti qoldana otyryp, barlyq Qazaqstan halqyn osydaı úlken merekemen quttyqtaǵym keledi», - dedi tanymal qazaqstandyq ánshi Qaırat Baekenov.
Keshte óner tulǵasy kórermenderge óz repertýaryndaǵy tanymal ánderiniń jańasha, zamanaýı óńdelgen nusqalaryn usyndy. Munymen qosa, ol kontsert barysynda osy sharaǵa arnaıy jazylǵan jańa týyndylaryn da tartý etti.
