Elimizden Qytaıǵa mııa tamyryn tasymaldaý toqtaı ma
ASTANA. QazAqparat - Búgin Parlament Senatynyń jalpy otyrysynda depýtat Murat Baqtııaruly ońtústik óńirlerden mııa tamyry Qytaıǵa qadaǵalaýsyz tasymaldanyp jatqanyn aıtty, dep habarlaıdy QazAqparat.
«Qazir mamandarymyz elmizde jalpy 1,5 myńǵa tarta dárilik ósimdikterdiń túrleri ósetindigin, olardyń tek 40-qa jýyǵynyń ǵana medıtsınalyq shıkizat retinde paıdalaný qory bar ekenin aıtyp otyr. Ókinishke qaraı, ońtústik óńirlerde ǵana ósetin emdik dári-dármek jasaýda taptyrmas baǵaly mııa tamyryn jınaý toqtamaı tur. Tek Qyzylorda oblysy boıynsha eki jyldyń ishinde 1 800 tonna qyzyl mııa tamyry Qytaıǵa jóneltilse, Ońtústik Qazaqstan oblysy aýmaǵynan sońǵy tórt jyl ishinde 63 000 tonna mııa tamyry jınalyp, ózge elderge jiberilgen. Sonyń nátıjesinde myńdaǵan gektar arıdtik aımaqtardaǵy jerler degradatsııaǵa ushyraýda, tabıǵatqa orasan zor zııan kelýde»,-dep toqtaldy Baqtııaruly QR Úkimet basshysy Baqytjan Saǵyntaevtyń atyna joldaǵan depýtattyq saýalynda.
Onyń sózine qaraǵanda, elimizdiń mamandary dárilik ósimdikterdi qoldan ósiretin jáne ony tereń óńdeıtin tehnologııalardy paıdalanýdy jolǵa qoısa, el ekonomıkasyna júz mıllıondaǵan tabys ákelýge bolatynyn aıtýda.
«Mysaly, kórshi Ózbekstanda mııa tamyryn qoldan ósirip, tereń óńdeıtin Japonııa, Qytaı, AQSh ınvestıtsııalary salynǵan 20 iri kásiporyn jumys isteıdi. Olar mııa eksportynyń 70 paıyzdan astamyn tereń óńdep satýda»,-dedi senator.
Osy oraıda ol ósimdik álemin qorǵaý týraly arnaıy zań joq ekenin aıta kele, sondyqtan qysqa merzimde bul salada tıisti zań qabyldaý kerektigin atap ótti.
