Elimizden iri qara men usaq maldy áketýge tyıym salynbaq

ASTANA. QazAqparat – Qazaqstan aýmaǵynan iri qara men usaq maldy (urǵashy) áketýge tyıym salynýy múmkin. Bul týraly Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti jáne Qarjy mınıstrliginiń Memlekettik kirister komıtetiniń birlesken buıryǵynda jazylǵan, dep habarlaıdy QazAqparat tilshisi.

«Qazaqstan Respýblıkasynyń aýmaǵynan analyq iri qara maldy jáne analyq usaq maldy áketýge 6 aı merzimge tyıym salý engizilsin», - delingen «Ashyq» NQA portalynda jarııalanǵan birlesken buıryqta.

Salynýy múmkin eksporttyq shekteýdi iske asyrý men qadaǵalaý Aýyl sharýashylyǵy jáne Qarjy mınıstrliginiń tıisti komıtetterine júkteledi.

Qujatty ashyq talqylaý 9 naýryzǵa deıin jalǵasady.

Qosa keteıik, buǵan deıin el aýmaǵynan kólikpen kómir áketýge jarty jylǵa tyıym salynýy yqtımal ekenin habarlap edik.