Elimizdegi jylý jelileriniń 70 paıyzynyń tozyǵy jetken
ALMATY. 26 naýryz. QazAqparat /Erlik Erjanuly/ - Ortalyq Azııa elektr energetıkalyq korporatsııasy 5 jylda Pavlodar, Ekibastuz, Petropavl qalalarynyń jylý jelilerindegi tozýdy 70-ten 45 paıyzǵa deıin azaıtpaq.
Bul búgin Almatyda «Ortalyq Azııa elektr energetıkalyq korporatsııasy» (OAEK) AQ-y men Eýropa qaıta qurý jáne damý banki (EQDB) jańartý jónindegi zaem kelisimine qol qoıý rásiminde aıtyldy.
«Qazaqstannyń jylý jelileriniń tozýy qazirgi tańda 80 paıyzǵa jetti. Bul ahýal barlyq keńestik respýblıkalardyń qalalaryna tán ahýal. Qazaqstanda jylýmen qamtý salasynyń ınvestıtsııalyq tartymdylyǵy arnaıy jańa zań qabyldanǵannan keıin sońǵy kezde ǵana artyp kele jatyr. Oǵan buǵan deıin aıtarlyqtaı ınvestıtsııa tartylǵan joq. Sondyqtan energetıkalyq kompanııalar endi ǵana jylý jelilerindegi shyǵyndy azaıtýdyń úsh, bes jyldyq josparlaryn jasaı bastady. Bizdiń basty maqsatymyz jylý jelilerindegi tozýdy qalypty deńgeıge túsirý», - deıdi «Ortalyq Azııa elektr energetıkalyq korporatsııasy» AQ-nyń Dırektorlar keńesiniń tóraǵasy Aleksandr Klebanov.
Onyń aıtýynsha, búgingi tańda respýblkadaǵy jylý jelileriniń shyǵyny 30 paıyzdy qurap otyr. Al «Pavlodarenergo» AQ-nyń Basqarma tóraǵasy Anatolıı Dýkanyń sózine qaraǵanda, onda jylý qubyrlarynyń 80-85 paıyzy tozǵan. Sondyqtan jelidegi shyǵyn kólemi de onda birshama joǵary bolyp otyr. Sol sebepti bıznes jospar boıynsha óndiristi qaıta qurý jumystary júrgizilýde. Máselen, bıyl №1 qazandyqta jańa týrbına iske qosylmaq. 30-jyldan keıin aýystyrylǵan bul týrbınanyń burynǵyǵa qaraǵanda qýaty da joǵary.
