Elimizdegi júıke aýrýyn emdeıtin mekemelerdegi zańsyzdyqtyń saldary qaıǵyly jaǵdaılarǵa dýshar etýde
ASTANA. 4 qarasha. QazAqparat /Aıdar Ospanalıev/ - Azamattardyń Konstıtýtsııalyq quqyqtarynyń qorǵalýyn qamtamasyz etý maqsatynda elimizdegi psıhıatrııalyq statsıonarlarǵa tekserý júrgizgen Bas prokýratýra atalmysh mekeme ókilderiniń 7 myńnan astam azamattardyń quqyqtaryn buzǵandyǵyn anyqtady. Bul máseleler jóninde búgin jýrnalıstermen bolǵan brıfıngte Bas prokýratýranyń resmı ókili Jandos Ómirálıev málim etti.
Onyń sózine qaraǵanda, Almaty qalasynyń prokýrorlary respýblıka azamatyn ishki ister organy tergeýshisiniń qaýlysynyń negizinde májbúrli túrde Psıhıkalyq densaýlyq ortalyǵyna jatqyzǵan. Al zańǵa sáıkes, mundaı shara sot sheshiminiń negizinde júzege asýy tıis. Sondaı-aq Qaraǵandy jáne Qostanaı oblystarynda medıtsına qyzmetkerleri májbúrli túrde jatqyzylǵan aýrý azamattardyń emhanada bolý merzimin uzartý týraly zań talaptaryn da buzý jaǵdaılary anyqtaldy.
«Al keı jaǵdaılarda medıtsına qyzmetkerleri aýrý azamattardy aýrýhanadan merziminen buryn shyǵaryp jiberip, nátıjesinde naýqastardyń zańsyz áreketterge barý jaǵdaılary da oryn aldy. Osyndaı mysaldardyń biri Qostanaı oblysyndaǵy psıhıatrııalyq aýrýhanadan shyǵarylǵan azamat, ózi bosaǵannan keıin bir aı ótpesten anasy men balasyn óltirdi», - dedi resmı ókil.
