Elimizdegi jumysshylardyń úshten biri oqys jaǵdaılardan saqtandyrylǵan

NUR-SULTAN. QazAqparat - Senattyń Qarjy jáne bıýdjet komıteti Olga Perepechınanyń tóraǵalyǵymen «Saqtandyrý narǵynyń damý keleshegi. Ómirdi saqtandyrýdy retteý jáne damytý baǵyttary» taqyrybynda dóńgelek ústel otyrysyn ótkizdi, dep habarlaıdy QazAqparat.

Іs-shara barysynda saqtandyrý naryǵynyń damý keleshegi, jumysshyny oqys jaǵdaıdan mindetti saqtandyrý júıesin jetildirý jáne kompanııalardyń ómirdi saqtandyrý boıynshy qyzmeti jan-jaqty talqylandy.

«2018 jylǵy jazda Saqtandyrý jáne saqtandyrý qyzmeti, baǵaly qaǵazdar naryǵy máseleleri týraly zań qabyldandy. Sonyń nátıjesinde qarjy qyzmetin, sonyń ishinde saqtandyrý qyzmetin tutynýshylardyń quqyqtaryn qorǵaý tetikteri qalyptasty. Bul halyqtyń saqtandyrý júıesine degen senimin aıtarlyqtaı ósirdi. Sondaı-aq, ótken jyldyń aıaǵynda qabyldanǵan Ekonomıkalyq ósýdi qalpyna keltirý máseleleri týraly zań da saqtandyrý naryǵynyń damýyna tyń serpin berdi. Atalǵan qujatta zeınetaqy annýıtetin usynatyn kompanııalardyń qyzmetterin keńeıtýge qolaıly jaǵdaı jasaý máselesi qarastyrylǵan», – dedi komıtet tóraǵasy Olga Perepechına.

Dóńgelek ústel barysynda Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva halyqtyń saqtandyrýǵa qyzyǵýshylyǵyn arttyrý maqsatymen qabyldanǵan sharalar týraly aıtty. Odan bólek ol qolǵa alynǵan naqty jumystar azamattardyń jınaqtaý bastamalaryn kóbeıtýge, halyqtyń saqtandyrýmen qamtylýyn qamtamasyz etýge jáne saqtandyrý qyzmetiniń qoljetimdiligin arttyrýǵa múmkindik beretinin atap ótti.

Óz kezeginde Qazaqstan qarjygerleri qaýymdastyǵy keńesiniń tóraǵasy Elena Bahmýtova ómirdi saqtandyrý kompanııalarynyń azamattardy zeınetaqymen qamtamasyz etýdiń balamasyn usynýy jáne memlekettik bilim berý jınaqtaý júıesi týraly aıtty.

Onyń aıtýynsha, sońǵy 5 jylda BJZQ-dan zeınetaqy tóleminiń jalpy kólemin saqtaı otyryp, zeınetaqy jınaǵyn saqtandyrý kompanııalaryna aýdarý 2 esege, ıaǵnı, 23 mıllıardtan 46 mıllıard teńgege ósken. Osy 5 jyl ishinde zeınetaqy alýshylardyń qatary 8 paıyzǵa artqan.

Al, Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov jumysshylardy saqtandyrý salasy boıynsha atqarylyp jatqan jumystarǵa toqtaldy. Ol birqatar saqtandyrý kompanııalary óndiriste zardap shekken azamattarǵa tólemder tóleıtinin tilge tıek etti. Elimizde saqtandyrý salasynda 28 kompanııa jumys isteıdi. Olardyń 9-y ómirdi saqtandyrý máselelerimen aınalysady. Olar 2020 jyly 57,3 myń kelisimshart jasaǵan. Alaıda, bul jumys isteıtin azamattardyń jalpy sanynyń 31 paıyzyn ǵana quraıdy. Demek, elimizdegi jumysshylardyń úshten biri ǵana oqys jaǵdaılardan saqtandyrylǵan.

Komıtet tóraǵasy Olga Perepechına dóńgelek ústeldi qorytyndylaı kele, saqtandyrý qyzmeti qarjy naryǵynda qarqyndy damyp kele jatqan baǵyttardyń biri ekenin aıtty. Osy salanyń ári qaraı órkendeýi úshin búgingi is-shara barysynda aıtylǵan máselelerdi sheshý kerektigine de nazar aýdardy. Kóterilgen máselelerdiń eń mańyzdylarynyń negizinde Úkimet pen Qarjy naryǵyn retteý jáne damytý agenttigine arnalǵan usynymdar daıarlanady.

Kezdesýge múddeli memlekettik organdar men ómirdi saqtandyrý kompanııalarynyń basshylary qatysty.