Elimizdegi JOO-larda arhıv isi boıynsha mamandyqtar ashý kerek - Raıymqulova

NUR-SULTAN. QazAqparat – Elimizdiń joǵary oqý oryndarynda arhıv isi boıynsha mamandyqtar ashý kerek. Bul týraly QR Prezıdenti janyndaǵy Adam quqyqtary jónindegi komıssııa otyrysynda Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.

«Arhıv mekemelerin bilikti kadrlarmen qamtamasyz etý problemasy ózekti bolyp qalýda. Respýblıka arhıvterinde beıini boıynsha bilimi bar mamandardyń bar-joǵy 2,5 paıyzdy quraıdy. Sonymen qatar mınıstrlikke elektrondyq qujat aınalymy jáne elektrondyq arhıv bóligindegi qyzmetterdi bergennen keıin tehnıkalyq bilimi bar mamandar tapshylyǵy problemasy ótkir bolyp tur», - dedi mınıstr.

Onyń aıtýynsha, keıbir arhıvterde jyl ishinde aýysymdylyq quramnyń 50 paıyzdan astamyn quraıdy. Bul rette, memlekettik arhıv mekemeleriniń shtat sanynyń qysqarýyna qaramastan, saqtalatyn qujattar kóleminiń ulǵaıýy baıqalady.

«Arhıv salasynda bilikti kadrlardyń jetispeýshiliginiń basty sebebi - arhıvshi mamandyqtary mártebesiniń tómendigi. Sondyqtan respýblıkanyń joǵary oqý oryndary osy baǵyt boıynsha mamandar daıarlaýǵa múddeli emes. Mysaly, Ál-Farabı atyndaǵy Qazaq ulttyq ýnıversıteti - «Arhıv-júrgizý», «Qujat-júrgizý» jáne «Qujattamalyq qamtamasyz etý» mamandyqtary boıynsha mamandar daıarlaýdy júzege asyratyn jalǵyz joǵary oqý orny. Sondyqtan óńirlerdiń joǵary oqý oryndarynda arhıv isi jáne qujattama salasy boıynsha mamandyqtar ashý, sondaı-aq QR Bilim mınıstrligi «Arhıvtaný», «Qujattaný» jáne «Qujattamalyq qamtamasyz etý» mamandyqtary boıynsha memlekettik granttardy ulǵaıtý qajet», - dedi Aqtoty Raımqulova.