Elimizdegi joldardyń jaǵdaıy 4 paıyzǵa jaqsardy - A. Jumaǵalıev
ASTANA. 1 sáýir. QazAqparat - Elimizdegi joldardyń jaǵdaıy 4 paıyzǵa jaqsardy. Bul shara óz kezeginde tranzıttik tasymaldyń 20 paıyzǵa artýyna yqpal etti.
Búgin Parlament Májilisinde ótip jatqan Úkimet saǵatynda Kólik jáne kommýnıkatsııa mınıstri Asqar Jumaǵalıev osylaı málim etti.
Mınıstrdiń aıtýynsha, avtokólik salasynda byltyr respýblıkalyq mańyzǵa ıe joldardyń 5,5 myń shaqyrymy jóndeý jumystarymen qamtylǵan. «Byltyr aldyńǵy jylmen salystyrǵanda jol jóndeý dınamıkasy artty. Respýblıkalyq joldardy jóndeý - 2,2 al, jergilikti joldar 3,6 myń shaqyrymǵa ósti. Sonymen qatar, Elbasynyń tapsyrmasyna sáıkes «Batys Eýropa Batys Qytaı» jobasynyń qurylys jumystary da qarqyndy júrýde. Sonyń nátıjesinde jeti júz shaqyrym jol salynyp, oǵan otyz bes myńǵa tarta adam, tórt myń dana tehnıka tartyldy» , dedi A. Jumaǵalıev.
Onyń sózine qaraǵanda, bıyl segiz júz alty shaqyrym jol salynyp, qozǵalystardy ashý josparlanýda. «Eger osy jumysty ótkizý aıasynda qyryq myń adam tartylsa, bul bir jaǵynan halyqty jumyspen qamtamasyz etýge de zor múmkindik beredi», deıdi mınıstr.
