Elimizdegi jolaýshy vagondarynyń 45 paıyzy tozǵan
NUR-SULTAN. QazAqparat – Bıyl Qazaqstan 63 jolaýshy vagonyn satyp alady. Bul týraly QR Indýstrııa jáne ınfraqurylymdyq damý mınıstrligi QazAqparattyń resmı saýalyna bergen jaýabynda aıtty.
Mınıstrliktiń deregine sensek, qazaqstandyq jolaýshylarǵa 2,6 myńnan astam vagon qyzmet kórsetedi. Alaıda bul jaz mezgili men mereke, demalys kúnderinde jetkiliksiz. Osynyń saldarynan jaz saıyn jurt kóptegen baǵyttarǵa bılet tappaı sarylady.
«Qazaqstandyq jolaýshy vagondarynyń parki 2,6 myńnan asady. Olardyń ortasha tozý deńgeıi 45,9 paıyz shamasynda. Qoldaný merzimine baılanysty vagondardyń isten shyǵýyn, adamdar kóp júretin jaz mezgili men demalys, mereke kúnderinde vagon tapshylyǵy bolatynyn eskersek, jyl saıyn 200-ge jýyq jańa vagon qajet», -delingen resmı málimette.
Vedomstvonyń habarlaýynsha, osy qajettilikti óteý úshin kezeń-kezeńimen qaryzǵa vagon satyp alý josparlanyp otyr.
«Jyljymaly quramnyń parkin jańartý jónindegi is-sharalardyń kúrdeli salymdardy qajet etetinin eskere otyryp, vagondardy kezeń-kezeńimen qaryzǵa satyp alý jóninde memlekettik baǵdarlama ázirlengen. Bir jolaýshy vagonynyń baǵasy - 450 mln teńge», - delingen mınıstrlik jaýabynda.
Vedomstvonyń málimetine qaraǵanda, 2016-2018 jyldar aralyǵynda tasymaldaýshylar 240 jańa vagon satyp alǵan. Sondaı-aq, aldaǵy ýaqytta 360 vagon satyp alý josparlanyp otyr. Onyń 63-i bıyl jetkizilýi tıis.
