Elimizdegi jol apattarynyń 30% Almaty qalasynda oryn alǵan - QR Bas prokýratýrasy

ASTANA. QazAqparat - Elimizde jyl basynan beri oryn alǵan jol apatynyń 30 paıyzy Almaty qalasynda oryn alyp otyr. Ústimizdegi jyly bul aımaqta adamdardyń dene jaraqatyna jáne kisi ólimine alyp kelgen 3 099 JKO tirkelgen, dep habarlaıdy QR Bas prokýratýrasy Quqyqtyq statıstıka jáne arnaıy esepke alý jónindegi komıtettiń baspasóz qyzmetinen.

«Apattylyǵy az Soltústik Qazaqstan oblysy bolyp otyr, onda 134 JKO oryn alǵan. Sondaı-aq Ońtústik Qazaqstan -1308 (1694), Aqmola - 259 (352) jáne Qaraǵandy - 429 (533) oblystary JKO sany tómen aımaqtarǵa jatady. Buǵan kerisinshe, Batys Qazaqstan 249 (176) jáne Shyǵys Qazaqstan 817 (726) oblystarynda JKO-nyń birshama ósýi baıqalady. Batys Qazaqstan oblysynda JKO ósýi saldarynan onda jaraqat alǵandar sany da ósken - 382(258). Shyǵys Qazaqstan oblysynda da jaǵdaı osyǵan uqsas - 1133(994), alaıda munda osy jyly qaza bolǵandardyń sany 28 paıyzǵa tómendegeni 72(90) baıqalady», delingen habarlamada. Sondaı-aq JKO saldarynan Qaraǵandy 83 (93), Mańǵystaý 39(52), Aqtóbe 50 (55) oblystarynda qaza bolǵan adamdardyń sany azaıǵan. Statıstıka kórsetip otyrǵandaı, jol apattarynyń sebepteri ózgerissiz qalyp otyr. Burynǵysynsha JKO-nyń nemese 90%-y jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, júrgizýshilerdiń kinásinen 9 559 jol apaty bolsa, onyń ishinde 326 júrgizýshi alkogoldik nemese esirtkilik mastaný kúıinde bolǵan. Elimizde tirkelgen JKO týraly jan-jaqty aqparatty Bas prokýratýranyń Quqyqtyq statıstıka jáne arnaıy esepke alý jónindegi komıtetiniń saıtynda service.pravstat.kz adresi boıynsha «Aqparattyq servıs» bóliminde ornalasqan jol apattylyq kartasynan alýǵa bolady. Eske sala keteıik, jyl basynan beri ótken 7 aı ishinde elimizdiń joldarynda 10 187 jol-kólik oqıǵasy bolyp, onda 14 278 adam zardap sheken.