Elimizdegi joǵary oqý oryndary stýdentteriniń 50 paıyzdan astamy qazaq tilinde bilim alyp jatyr - Bilim mınıstri
ASTANA. Naýryzdyń 19-y. QazAqparat /Qanat Mámetqazyuly/ - Elimizdegi joǵary oqý oryndary stýdentteriniń 50 paıyzdan astamy qazaq tilinde bilim alyp jatyr.
Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda baıandama jasaǵan QR Bilim jáne ǵylym mınıstri Janseıit Túımebaev osylaı málim etti, dep habarlaıdy QazAqparat.
«Qazaq tilinde bilim beretin mektepter jelisi elimiz táýelsizdik alǵannan bergi jyldarda úzdiksiz ósip keledi. Máselen, qazaq mektepteriniń sany 1991 jylmen salystyrǵanda 906 uıymǵa, onyń ishinde sońǵy on jylda 266 mektepke kóbeıdi. Jalpy, qazirgi kezeńde 5 myń 888 mektep qazaq tilinde jumys isteıdi, bul elimizdegi barlyq mektepterdiń 77,7 paıyzyn quraıtyn. Osyǵan oraı, qazaq tilinde oqıtyn balalar sany 1990-91 jyldan beri qaraı eseptegende jarty mıllıonnan astamǵa ósip, búgingi kúni bular barlyq mektep oqýshylarynyń 62 paıyzyn qurap otyr», dedi J. Túımebaev.
Mınıstrdiń sózine qaraǵanda, qazaq balalarynyń 84,6 paıyzy jáne 28 myń 265 basqa ult balalary qazaq tilinde oqytylatyn mektepterde bilim alýda. Al kásiptik lıtseıler men kolledjderde 50,4 paıyz qazaq tilinde oqıtyndardy qurap otyr.
«2001 jyly elimizde joǵary oqý oryndary stýdentteriniń tek 31 paıyzy ǵana qazaqsha oqysa, qazirgi kúni bulardyń 50 paıyzdan astamy memlekettik tilde bilim alýda», dedi mınıstr.
