Elimizdegi jergilikti memlekettik sáýlet-qurylys baqylaý organdary basshylarynyń 25 paıyzynyń qurylys salasynda arnaıy bilimi joq
ASTANA. Naýryzdyń 9-y. QazAqparat /Ernur Aqanbaı/ - Elimizdegi jergilikti memlekettik sáýlet-qurylys baqylaý organdary birinshi basshylarynyń tórtten bir bóliginiń qurylys salasynda arnaıy bilimi joq.
Bul týraly búgin Úkimet otyrysynda Qurylys isteri jáne turǵyn úı-kommýnaldyq sharýashylyǵy agenttiginiń tóraǵasy Serik Nokın aıtty, dep habarlaıdy QazAqparat.
«Qoldanystaǵy qadaǵalaý jáne baqylaý júıesiniń deńgeıi men sapasyn sıpattaý úshin birqatar mysaldar keltireıin. Qazirgi ýaqytta Qazaqstandaǵy jergilikti memlekettik sáýlet-qurylys baqylaý organdary birinshi basshylarynyń 25 paıyzynyń qurylys salasynda arnaıy bilimi joq. Tutastaı alǵanda baqylaýshy organdardaǵy kadrlardy daıyndaý deńgeıiniń óte tómendigin atap ótý qajet. Máselen, sońǵy josparly attestattaýdyń nátıjesinde jergilikti memlekettik sáýlet-qurylys baqylaý organdarynyń 70 qyzmetkeriniń 29-y nemese 41,1 paıyzy attestatsııadan ótpeı qaldy», dedi otyrysta S. Nokın.
Onyń aıtýynsha, budan bir ǵana qorytyndy shyǵarýǵa bolady: qurylystaǵy qadaǵalaý jáne baqylaý júıesin reformalaý qajet jáne sonyń negizinde mamandardyń kásibı deńgeıin jáne olardyń jeke jaýapkershiligin arttyrý kerek. «Memlekettik qadaǵalaý jáne baqylaý organdaryna qosymsha qadaǵalaý jáne baqylaý salasyndaǵy jeke mamandardyń ınstıtýtyn qurý kózdelip otyr. Bularǵa da memlekettik organdardyń qyzmetkerlerine qoldanylatyn sertıfıkattaý qaǵıdaty qoldanylatyn bolady», dedi ol.
