Elimizdegi jer kartalarynyń 80 paıyzy jergilikti jerdiń naqty jaǵdaıyna sáıkes kelmeıdi

Búgin QR Parlamenti Májilisinde ótken Úkimet saǵatynda Jer resýrstaryn basqarý agenttiginiń tóraǵasy Ómirzaq Ózbekov osylaı málim etti.

Tóraǵanyń aıtýynsha, agenttikke geodezııa jáne kartografııa qyzmetine úılestirý fýnktsııalary júktelgen. «Búgingi kúni elimizdegi jer kartalarynyń 80 paıyzǵa jýyǵy jergilikti jerdiń qazirgi jaǵdaıyna jáne memlekettiń toponomıkasyna sáıkes kelmeıdi. Memlekettik topografııalyq kartalar jyldam eskirip jatyr. Bul ekonomıkaǵa aıtarlyqtaı zııan keltirýi, keıde orny tolmas shyǵyndar ákelýi múmkin», - deıdi Ó. Ózbekov.

Onyń aıtýynsha, ótken jyly Astana qalasynyń iri masshtabtaǵy kartasy daıyndalǵan. Almaty men Atyraý qalasynyń sandyq aerofoto túsirilimderi de júrgizilgen. Ekonomıkaǵa qajetti ártúrli masshtabtaǵy 1 myń 700 paraq topografııalyq kartalar da qaıta jańartylǵan. «2008 jyldan bastap agenttik Kaspıı teńiziniń qazaqstandyq sektoryna teńiz tabanynyń iri masshtabtaǵy teńiz kartasyn jasaýda. Qazirgi keze tıisti geodezııalyq jáne kartografııalyq izdestirý jumystary júrgizilýde. Jer silkinisteriniń bastapqy belgileri bolyp tabylatyn jer qyrtysyndaǵy geodınamıkalyq ózgeristerdi baqylap otyrý úshin Almaty, Shelek, Jambyl jáne Zaısan geodınamıkkalyq polıgondarynda joǵary dáldiktegi geodezııalyq ólshemdik jumystar jalǵastyrylýda», - dedi Ó. Ózbekov.