Elimizdegi jekemenshik eńbek agenttikteriniń quziretin zańdyq turǵydan qaıta qaraý qajet - Q. Sádýaqasov
áýirdiń 15-i. QazAqparat /Qanat Mámetqazyuly/ - Elimizdegi jekemenshik eńbek agenttikteriniń quziretin zańdyq turǵydan qaıta qaraý qajet.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda depýtat Qaırat Sádýaqasov osylaı málim etti, dep habarlaıdy QazAqparat.
«Jalpy, halyqaralyq uıymdardyń boljamy boıynsha, eger Qazaqstannyń ekonomıkalyq ósim qarqyny turaqty bolatyn bolsa, elimizge keletin eńbek mıgranttaryna qajettiligi de arta túsedi. Demek shetelden keletin eńbek mıgranttary problemasy aldaǵy jyldary da kúrdeli máselege aınalyp ketýi ǵajap emes», dedi depýtat. Osy rette Q. Sádýaqasov Parlamentte talqylanyp jatqan zań jobasyna qatysty birqatar pikirlerin ortaǵa saldy.
«Birinshiden, elimizdegi jekemenshik eńbek agenttikteriniń quziretin zańdyq turǵydan qaıta qaraý qajet. Halyqaralyq tájirıbege súıensek, bundaı agenttikterdiń quzyryna birqatar mindetterdi júkteıdi. Atap aıtqanda, ondaı agenttikter eńbek mıgranttaryn tirkeý, jumysqa ornalastyrý, densaýlyǵyn qadaǵalaý, áleýmettik, quqyqtyq turǵydan qorǵaý, olar jóninde tıisti memlekettik organdarǵa aqparat berip turý sekildi jaýapty jumystaryn da atqarady. Sondyqtan da, Qazaqstandaǵy jekemenshik eńbek agentteri ózderiniń quqyqtyq mártebesin zańdy tulǵa retinde bekitip, lıtsenzııa alýlary qajet. Ekinshiden, sheteldik eńbek mıgranttary úshin qazaq tilin eń quryǵanda ortasha dárejede bilýi mindetteý kerek. Bul da olardyń ortaǵa sińisýine jol ashatyn qadam. Olardyń qoǵamdyq qatynastarynda tildik kedergilerdiń bolmaýyna úlken áser etedi. Úshinshiden, árbir eńbek mıgrantyna kepildik depozıt ashýdy mindetteý qajet. Eger zań buzyp, olardy elden alastaý qajet bolǵan jaǵdaıda osy salym el bıýdjetine aýdarylyp, elden shyǵaryp jiberýge ketetin shyǵynnyń ornyna quıylady», dedi depýtat.
